नेपाल–भारत सिमानामा जे–जे हुँदैछ
संसदबाट संविधानको अनुसूची संशोधनमार्फत चुच्चे नक्सा जारी गरेपछि छिमेकी मुलुकसँग त्यसको स्वीकार्यताका लागि पहल नगरी नेपाली–नेपाली जम्मा भएर नक्सा हेर्दै रमाउने काम त भइरहेकै थियो । यतिबेला चाहिँ नेपाल–भारतको सीमास्तम्भ अध्यावधिक गर्ने चटारो छ ।
क्षेत्राधिकार र भूमिकाका विषयलाई लिएर नेपाल प्रहरीसँग समय–समयमा लफडा चलिरहने सशस्त्र प्रहरीलाई सरकारले सीमास्तम्भ अध्यावधिक गर्ने थप जिम्मेवारी दिएको छ । यसअघि नापी विभागले गर्दै आएको काम सशस्त्रले गरिरहेको छ । विशेषतः मधेस प्रदेशका ६ जिल्लामा अवस्थित सीमास्तम्भ (जंगे पिलर) अध्यावधिक गर्ने काम अगाडि बढेको हो ।
नेपाल–भारतबीच आठ हजार पाँच सय ५५ किलोमीटरमा फैलिएका सीमास्तम्भमध्ये जोर नम्बरका स्तम्भ भारतीय अर्धसुरक्षा दस्ता एसएसबीले र बिजोर नम्बरका स्तम्भ सशस्त्रले मर्मत–सम्भार गर्ने सहमतिअनुसार काम भइरहेको छ । दुई देशको सीमा व्यवस्थापनसम्बन्धी संयन्त्रले गरेको सहमतिअनुसार, सन् २०१४ यता बनेका र त्यही स्थितिका सीमास्तम्भको मात्रै मर्मत र सम्भार गरिँदैछ । जबकि, कतिपय सीमास्तम्भलाई भारतले बलमिच्याइँका साथ तलमाथि पारेका विषय समय समयमा उठ्दै आएका छन्, त्यसतर्फ भने कुनै अग्रसरता लिइएको छैन ।
भनिन्छ, त्यो विषयमा प्रवेश गरेको भए अहिले भइरहेकै काम पनि नहुने स्थिति थियो । अहिले सशस्त्रले गरिरहेको काम भारतीय पक्षले भने गत बर्ष नै सकिसकेको छ । एसएसबीले आफ्नो भागमा परेका एक हजार ५६ सीमास्तम्भको मर्मत र सम्भारकार्य सम्पन्न गरेको छ । नेपाल पक्षले गर्नुपर्ने २२ सय स्तम्भका काम हुन् । त्यसका निम्ति सशस्त्रलाई ६०–७० लाखको हाराहारीमा बजेट दिइएको छ ।
शुक्रबारदेखि शुरु भएको यो कामका दौरान उसले मधेस प्रदेशका ७० भन्दा बढी स्तम्भको काम सिध्याएको छ । अब हिउँद लागेपछि मधेसमा शीतलहर शुरु हुने र काम गर्न सकिने अवस्था रहँदैन । कात्तिक महिनाभरि काम हुन्छ र बाँकी काम चैत लागेपछि गरिने भएको छ । किनभने, शीतलहरले सिमेन्टीको दिगोपन, रङ कोटिङ गर्नेजस्ता काम प्रभावित हुन्छन् ।
ट्रेन्डिङ पोस्ट
टिप्पणीहरू