कारागारमा योग शिविर गर्ने सरकारको निर्णय, नख्खुबाट थालिने गृहको भनाई

सरकारले मुलुकभरका कारागारमा १० दिनको बृहत्त योग शिविर सञ्चालन गर्ने भएको छ । आपराधिक क्रियाकलापमा संलग्न भएको अभियोगमा जेल परेका कैदीबन्दीमा सकारात्मक सोचको विकास गर्ने उद्देश्यले शिविर सञ्चालन गर्न लागिएको बताइएको छ । 

उपप्रधानमन्त्री तथा गृहमन्त्री नारायणकाजी श्रेष्ठको अध्यक्षतमा हिजो मन्त्रालयमा बसेको बैठकले उक्त अभियान अघि बढाउने निर्णय गरेको छ । मुलुकभरका कारागारमा योग शिविर सञ्चालन गर्ने उपप्रधानमन्त्री श्रेष्ठको अभियान नै रहेको मन्त्रालयका अधिकारीहरु बताउँछन् ।

बैठकमा उपप्रधानमन्त्री श्रेष्ठसहित गृहसचिव दिनेश भट्टराई, कारागार व्यवस्थापन विभागका महानिर्देशक काशीराज दाहाल, नेपाल विपश्यना केन्द्रका क्षेत्रीय आचार्य रुप ज्योति, पूर्वप्रहरी महानिरीक्षक कुवेरसिंह रानालगायतको उपस्थिति रहेको बताइन्छ । 

१० दिनको शिविर नख्खु कारागागरबाट प्रारम्भ गरिने उल्लेख छ । मुलुकभरका ७४ वटा कारागारमा करिब २५ हजार कैदीबन्दी छन् ।