इटहरीका विद्यालयमा जंकफुड निषेध, दिवा खाजामा नयाँ मेनु

इटहरी उपमहानगरपालिकाले आफ्नो कार्य क्षेत्रभित्रका सरकारी विद्यालयमा जंकफुड निषेध गरेको छ । उपमहानगरपालिकाले कक्षा १ देखि ६ सम्मका विद्यार्थीलाई दिइने दिवा खाजामा जंकफुड निषेध गर्दै नयाँ खाजाको सूची (मेनु) सार्वजनिक गरेको छ । 

उपमहानगरपालिकाले आजबाट नयाँ खाजा लागु गरेको जनाएको छ । यसमा फलफूल, भुटेको अण्डा–मटर पनिर र चिउरा, गेडागुडी मिक्स र चिउरा, चामलको खिर र तरकारी, दही चिउरा र तरकारी, कुखुरा–खसीको मासु र चिउरा छन् ।

यसका लागि एरिना पार्टी प्यालेससँग सम्झौता गरिएको उपमहानगरपालिकाले जनाएको छ । यसअघि विद्यालय आफैंले विद्यार्थीहरुलाई खाजा खुवाउँदै आएको थियो । तर, दिवा खाजामा अधिकांश विद्यालयले जंकफुड दिने गरेको गुनासो आएपछि उपमहानगरपालिकाले टेण्डरमार्फत छनौट गरेर पहिलोपटक मासुसहितको मेनु भएको दिवा खाजा खुवाउन थालेको हो ।