इरानद्वारा इजरायलमाथि भीषण आक्रमण, नेपालीलाई घरभित्रै बस्न नेपाली दूतावासको आग्रह

इजरायलस्थित नेपाली राजदूतावासले अत्यावश्यक अवस्थामा बाहेक घरबाट बाहिर ननिस्कन त्यहाँ रहेका नेपालीलाई आग्रह गरेको छ । इजरायलमाथि इरानी हमला शुरु भएपछि दूतावासले सतर्क रहन सूचित गराएको बताइएको छ ।

दूतावासले स्थानीय सुरक्षा प्रोटोकलहरुको पालना गर्न, आफ्नो क्षेत्रका लागि जारी गरिएका अद्यावधिक सूचनाको बारेमा जानकार रहन, आफ्नो सुरक्षामा विशेष ध्यान दिन र सुरक्षित आश्रयस्थलको सुविधा भएको स्थलको आसपास रहन सल्लाह दिएको छ ।

‘आवश्यक सुरक्षाका लागि नेपाली दाजुभाइ तथा दिदीबहिनीहरुलाई स्थानीय सुरक्षा प्रोटोकलहरुको पालना गर्न, आफ्नो क्षेत्रका लागि जारी गरिएका अद्यावधिक सूचनाका बारेमा जानकार रहन र आफ्नो सुरक्षातर्फ विशेष ध्यान दिन, अत्यावश्यक अवस्थामा बाहेक बाहिर ननिस्कन तथा सुरक्षित आश्रयस्थलको सुविधा भएको स्थलको आसपासमै रहन समेत हार्दिक अनुरोध गर्दछौं’, सूचनामा उल्लेख छ । 

त्यस्तै, कुनै जानकारी चाहिएमा वा अप्ठेरो परेमा दूतावासका द्वितीय सचिव कुमारबहादुर श्रेष्ठको फोन नम्बर ०५२८२८९३०० वा सहचारी सञ्जयकुमार साहको फोन नम्बर ०५४५५८२०७७ मा सम्पर्क गर्न जानकारी दिइएको छ । 

इरानी हमला शुरु भएपछि हालै इजरायली होम फ्रन्ट कमाण्डले सर्वसाधारणका लागि नयाँ निर्देशनहरु जारी गरेको छ । भोलि राति ११ बजेसम्म शैक्षिक गतिविधिमा रोक लगाइएको छ भने ठूला स्तरको सभा–भेला नगर्न भनिएको छ ।

इजरायली सेनाका अनुसार इरानले दुई सयभन्दा बढी ड्रोन र मिसाइल प्रहार गरिसकेको छ ।