घण्टीमा खरो उत्रने महामन्त्रीलाई सह्राउँदै रास्वपाका थप नेता

सभापति रवि लामिछानेको एकछत्र चल्दै आएको राष्ट्रिय स्वतन्त्र पार्टी (रास्वपा) मा महामन्त्री डा. मुकुल ढकालको प्रतिवेदनले हलचल ल्याएको छ । ढकालले पार्टीको अवस्था निकै कमजोर रहेको विश्लेषणसहितको प्रतिवेदन ल्याएपछि रास्वपाको आन्तरिक किचलोसमेत क्रमश: प्रकट हुन थालेको छ । 

यसैबीच केन्द्रीय सदस्य गणेश कार्कीले महामन्त्री ढकाल आफ्नै लाइनमा आएको प्रतिक्रिया दिएका छन् । पार्टीभित्र मौलाउँदै गरेको सत्तामुखी प्रवृत्तिमाथि निर्मम टिप्पणी गर्दै आएका उनले ढिलै भए पनि महामन्त्रीले उक्त कुरा बुझेको बताए । 

इलाम-२ को उपचुनावमा अनपेक्षित नतिजा ल्याएको रास्वपाले देशभरको अवस्था बुझ्न महामन्त्री ढकाललाई खटाएको थियो । ३८ जिल्लाका नेता-कार्यकर्ता,समर्थक,शुभचिन्तक र स्थानीय जनतासँग अन्तरक्रिया गरी काठमाडौँ फर्किएका ढकालले हिजो साँझ सभापति लामिछानेलाई 'समीक्षा प्रतिवेदन' बुझाएका छन् । 

'सँगसँगै प्रश्न छन्,यो अवस्थामा पुग्यो कसरी ? संगठन अस्थिर र जथाभावी कसले बनायो ? आफ्नालाई अवसर दिन विधि मिचिमिचि पार्टी कार्यालयमा नै आन्दोलन समेत गर्न उक्सायो कसले ?'

प्रतिवदेनमा ढकालले पार्टीको अवस्था अत्यन्त खराब रहेको र यही अवस्था रहे आगामी निर्वाचनमा अस्तित्व जोगाउनसमेत कठिन हुने कठोर विश्लेषणसहितको तथ्य प्रस्तुत गरेका छन् । प्रतिवेदन बुझाउनुअघि उनले पार्टी दुर्घटनामा पर्दैछ भन्दा आफ्नो महामन्त्री पदको हत्या हुनसक्ने चिन्तासमेत गरेका थिए । 

उक्त प्रसंगमा केन्द्रीय सदस्य कार्कीले आलोचनात्मक हुँदैमा पार्टीले कारवाही गर्दैन भन्ने उदाहरण आफैँ भएकाले नआत्तिन सुझाएका छन् । 'पार्टी कोही व्यक्तिको अस्तित्व र गल्तीको भारीमा थिचिएर सकिँदैन । अनि,प्रश्न गर्दैमा, आलोचना गर्दैमा रास्वपामा पददेखि घोक्र्याइँदैन भन्ने सबुत प्रमाण म छु । नाजायज काम गरेकाहरू मात्र हुन् विचारसँग डराउने !', उनले सामाजिक सञ्जाल फेसबुकमा टिप्पणी लेख्दै भनेका छन् ।

त्यस्तै,कार्कीले महामन्त्रीको समझदारीपनलाई स्वागत पनि गरे ।  'पार्टीको विधि,चरित्र र बाटोको बारेमा मैले उठाइरहेको विषयमा आइपुग्नु भएकोमा स्वागत छ', उनले भनेका छन्, 'सँगसँगै प्रश्न छन्,यो अवस्थामा पुग्यो कसरी ? संगठन अस्थिर र जथाभावी कसले बनायो ? आफ्नालाई अवसर दिन विधि मिचिमिचि पार्टी कार्यालयमा नै आन्दोलन समेत गर्न उक्सायो कसले ?'