सेनापति छान्न घरदैलो,आज शशी भवनमा रात्रिभोज
भदौ २४ पछिलाई नयाँ प्रधानसेनापतिको रुपमा अघि सारिएका रथी अशोकराज सिग्देलको विवादित जन्ममितिसम्वन्धी समस्या तत्काल सल्टाउन आर्मी चिफ प्रभुराम शर्मा र रक्षा सचिव किरणराज शर्माले हिजो नेताहरुकोमा घर दैलो गरेका छन् । शनिवारको बिदा र असार १५ को दिन पनि दुई जना लञ्च अघिसम्म भेटघाटमा व्यस्त भएको स्रोतको दाबी छ ।
जन्ममितिको सम्बन्धमा घर घरमा गएर नेताहरुलाई ‘कन्भिन्स’ को प्रयास गरिएको बुझिएको छ । हिजो बिहान शशी भवनबाट सेनापति पहिले रक्षा सचिवलाई भेट्न गाडी लिएर निस्केको र त्यसपछि दुबैजना प्राइभेट नम्बर प्लेटको गाडीमा चलायमान भएको बताइन्छ । प्रधानसेनापति शर्माले सिग्देलको जन्ममिति र दोहोरो नगारिकताबारेमा बनाइएको एउटा ड्राफ्ट रक्षा मन्त्री हरि उप्रेतीको हातमा दिन लागेको स्रोतको दाबी छ । उक्त विषयमा संसदमा प्रश्न उठेकाले जवाफ दिन सजिलो हुने भन्दै ‘स्पिच नोट’ बनाइएको हो ।
यता रक्षा सचिव शर्मा स्वयमलाई अमेरिकी ग्रिनकार्डको लफडाले इन्तु न चिन्तु बनाइदिएको छ । समकालीन सचिवहरुले ‘शक्तिको पुजारी’ भन्ने विशेषण भिराइदिएकाले उनी मन्त्रीको सिग्नल बिना केही गर्न सक्ने हालतमा छैनन् ।
तर,सेना प्रमुखको इशारामा काम फत्ते गराउन लेफ्टिनेन्ट कर्नेल सुदिप अर्यालको प्रयास भने जारी देखिन्छ । अर्यालकै रोडम्यापमा हिजो चिफ र सचिव बिहान नेताहरुको घरमा पुगेको बताइन्छ ।
रक्षा मन्त्रालय र जंगी अड्डाबीच लियाजो अफिसरको भूमिकामा रहेका उनको राजधानीका सबैजसो ठूला व्यापारीसँग विशेष सम्बन्ध छ भनिन्छ । त्यही सम्बन्धलाई आगामी चिफको नियुक्तिमा प्रयोग गर्न खोजिएको अनुमान धेरैको छ । अरु नेतालाई भेटे पनि एमाले अध्यक्ष केपी शर्मा ओलीसँग भने भेटघाट हुने क्रममै रहेको स्रोतको दाबी छ ।
यसबीच धेरैजसो भूपू रक्षामन्त्रीलाई निम्तो गर्दै प्रधान सेनापतिको सरकारी निवास शशी भवनमा आज साँझ डिनर राखिएको छ । रक्षामन्त्री उप्रेती,पूर्व रक्षामन्त्री पूर्णबहादुर खड्का,रक्षा सचिव शर्मा, मधेशवादी दलका नेताहरु निम्तोमा सहभागी हुनसक्छन् । आजको डिनर असार १५ को उपलक्ष्य भन्ने नाम पनि दिने कोशिश हुनसक्छ ।
ट्रेन्डिङ पोस्ट
टिप्पणीहरू