ओलीको गाली, भण्डारीको मल्हम

एमाले अध्यक्ष केपी ओलीले नाम नलिइकन शब्दद्वारा काभ्रे जिल्ला अधिवेशनको उद्घाटनका बेला जेठ २८ गते झापड हानेका गोकुल बाँस्कोटालाई पूर्वराष्ट्रपति विद्यादेवी भण्डारीले मल्हम लगाएकी छन् । मदन जयन्तीका अवसरमा असार १४ गते धुलिखेलमा आयोजित कार्यक्रममा भण्डारीले बाँस्कोटाको खुलेरै प्रशंसा गरिन् । 

ओलीले केही वर्षअघिसम्म धर्मपुत्रझैँ ठानेर बालकोटको घर जिम्मा लगाएका, आफू प्रधानमन्त्री हुँदा पार्टीको केन्द्रीय सदस्यसमेत नहुँदै पहिलो पटक संसद प्रवेश गरेका बाँस्कोटालाई मन्त्री बनाए । धेरैले त्यतिबेला भनेका थिए– केपी ओलीको भण्डारे । बाँस्कोटाको उचाइ एकाएक उक्सियो । मन्त्री भएपछि उनको कडा बोली, सरकारको प्रतिरक्षा गर्ने शैली तथा कामबाट खुशी नै थिए ओली । धुलिखेल नगरपालिकाको स्थापना दिवसका दिन आएर भने पनि, ‘एकातिर सबै मन्त्री, अर्काेतिर गोकुल बाँस्कोटा ।’

त्यसो भनेकै केही दिनमै बाँस्कोटाले छाडा बोलेको र ७० करोड बार्गेनिङ गरेको टेप कांग्रेसनिकट पत्रकारले सार्वजनिक गरे । र, उनले नैतिकता देखाउँदै राजीनामा दिए । प्रचण्ड र सभामुख अग्नि सापकोटा उनका विरोधी थिए । यसर्थ उनी संसद नपुग्दै  सभामुखले राजीनामा आइसक्यो भनिदिए । अघिल्लो मन्त्रिपरिषद्का केही मन्त्री भ्रष्टाचार आरोपमा पटक–पटक मुछिएका प्रमाण सार्वजनिक हुँदा पनि नैतिकता देखिएन । एमालेका शेरबहादुर तामाङ त्यस्तै बोलीको शिकार बन्न पुगे । बाँस्कोटालाई सिध्याउन सके मात्रै आफ्नो राजनीति सहज देखेका कांग्रेस नेता अहिले चुपचाप छन् । तर, ओली–बाँस्कोटा सम्बन्धमा आएको दरार छरपष्ट भएसँगै जिल्लामा खासखुस बढेको छ । विद्यालाई ल्याएर तुजुक देखाएको भन्दै बाँस्कोटाको आलोचना शुरु भएको छ । 

‘एमाले मिलाउन सकिन’

धुलिखेलमा आयोजित जननेता मदन भण्डारीको ७३ औँ जन्मजयन्ती समारोहमा विद्यादेवीले राजनीतिलाई व्यवसायका रूपमा नलिन आग्रह गरिन् । ‘मैले राष्ट्रपति हुँदा एमालेभित्रको विवाद मिलाउन प्रयत्न गरेँ । त्यो एमालेका लागि थिएन, राष्ट्रका लागि थियो । तैपनि सम्भव भएन । किन झगडा गर्नु ? घरभित्रको झगडा । पार्टीभित्रको झगडाले देशलाई फाइदा पुर्‍याउँदैन । राजनीति कुनै व्यवसाय नभएकाले जनताद्वारा अनुमोदित हुनुपर्ने व्यवस्था छ’, पूर्वराष्ट्रपति भण्डारीले भनिन्, ‘आत्मकेन्द्रित भएर नसोचौँ । राष्ट्रकेन्द्रित भएर सोचौँ । एमाले पटक–पटक विभाजन भएर देशलाई घाटा लागेको छ ।’ 

‘मदनको बिर्सिएको बर्थडे’

४१ वर्षको हुनुहुन्थ्यो मदन । ०४८ साल असार १५ गते । दही–चिउरा खाने दिन । अहिले सरकारले त्यस दिनलाई धान दिवसका रूपमा मनाउने गरेको छ । कान्छी छोरी निशाकुशुम भण्डारीको जन्मदिन असार १५ गते हो । छोरी कराउँदै आइन् र भनिन्– मेरो जन्मदिन मनाइदिनुपर्‍यो । त्यतिबेलासम्म जन्मदिन मनाउने चलन थिएन । भर्खरै निर्वाचन सकिएको थियो । मदनले काठमाडाैँ जिल्ला निर्वाचन क्षेत्र नम्बर १ र ५ बाट जित्नुभएको थियो । पहिला काठमाडाैँमा ५ वटा क्षेत्र थिए । अहिलेको संरचनाले पहाडमा निर्वाचन क्षेत्र घटेर तराई र काठमाडाैँमा बढेको छ । निर्वाचनमा लामो समय खटेका कार्यकर्ता र स्वयंसेवकलाई घरमा बोलाएर एक दिन खाजा खुवाउनुपर्छ भन्ने सोचेको थिएँ । त्योभन्दा अघि कहिल्यै मदनको जन्मदिन थाहा थिएन । नागरिकता पनि हेरेको थिइन । मागिविवाह हो । खास सोधखोज पनि गरिएन ।

चुनावका बेला नागरिकताको फोटोकपी पेश गर्नुपर्ने रहेछ । तैपनि, जन्मदिन कहिले हो ? थाहा थिएन । न्वारानको नाम मोतीलाल भण्डारी रहेछ । पछि थाहा पाएँ । मैले छोरीको जन्म दिनको अवसर पारी एकै दिन सबैलाई साँझ घरमा बोलाएँ । हामी सबै खुशी थियौं, यस्तैमा मदनले जिस्कँदै व्यंग्य गरेर भन्नुभयो– ‘मेरो पनि हिजो जन्मदिन थियो, कसैले मनाइदिएन ।’ साथीहरू नेपालमै पहिलो पटक ब्रह्माको मूर्ति बनाएका छौं, आइदिनुप¥यो भन्न थाल्नुभयो । सहभागी भएँ । भूकम्पताका पार्टीले दिएका विभिन्न जिम्मेवारीमा सक्रियतापूर्वक काम गरेको थिएँ । मैले दायित्व भुलेको छैन । भर्खरै एमालेको निर्वाचन भएको थाहा पाएँ । निर्वाचितहरूलाई बधाई । एमालेविरुद्धको गठबन्धन हुँदा पनि गोकुल बाँस्कोटाले जित्नुभयो । उहाँलाई बधाई । बाँस्कोटाले जिल्लाका लागि पुर्‍याएको योगदान धेरै छ । 

२०५० असार १४ गते पहिलो पटक मदनको जन्मजयन्ती मनाइयो । बाँचुञ्जेल जन्मोत्सव नमनाएको मदनको जन्मजयन्ती त्यही बेलाबाट शुरु भयो । काठमाडाैँ महानगरपालिका–१ मा गमलामा ४१ वटा विरुवा रोपण गरियो । पछिल्लो वर्ष बल्खुस्थित एमाले केन्द्रीय कार्यालय निर्माणका लागि खरिद गरिएको जमिनमा ईश्वर पोखरेल र प्रदीप नेपालसहितको व्यवस्थापनमा वृक्षरोपण गरिएको थियो । यस अवसरमा विविध कार्यक्रम आयोजना गरेकोमा काभ्रे जिल्लालाई धन्यवाद !

एमाले पार्टी अध्यक्ष केपी ओली प्रधानमन्त्री हुँदा असार १४ गतेलाई राष्ट्रिय दिवस घोषणा गरी हरेक वर्ष वृक्षरोपण गर्न थालिएको छ । मदन भण्डारीको जन्मजयन्तीसँग यसको सम्बन्ध छ कि ? जस्तो लाग्छ । हुन त यस विषयमा कुराकानी भएको छैन तर मेरो मनले त्यही भन्छ । असार १४ राष्ट्रिय वृक्षरोपण । उहाँको निधनपछिको पहिलो वर्ष वृक्षरोपण गरेर मनाउन शुरु गरिएको थियो । 

केन्द्रीय सदस्य रेशम लामाको समूह कार्यक्रममा सहभागी भएन । तर, अध्यक्षमा उठेर पराजित भएका चन्द्र लामाको सबै समूह सामेल थियो ।