प्रहरी जवानबाट ‘बलात्कृत’ युवती दुई सातादेखि धर्नामा
विवाहको प्रलोभन देखाएर बलात्कार गर्ने प्रहरी जवानलाई कारबाहीको माग गर्दै प्रदर्शनरत जाजरकोटकी सराकुमारी शाही आज पनि धर्नामा बसेकी छिन् । गत असार २१ गतेदेखि राजधानीको माइतीघर मण्डलामा एकल प्रदर्शनरत उनले १४ औं दिन धर्नालाई निरन्तरता दिएकी हुन्।
विवाह गर्छु भनेर प्रहरी जवान भुपेन्द्र सिंह ठगुन्नाले जबरजस्ती करणी गरेको उनको आरोप छ । बलात्कार गर्ने ठगुन्नालाई अदालतले जोगाउन खोजेको उनको भनाइ छ । जुनिचाँदी गाउँपालिका–९ घर भएकी सराकुमारी पढाइको सिलसिलामा सुर्खेतको वीरेन्द्रनगर नगरपालिका–७ मा बसोबास गर्दै आएकी थिइन्।
सुर्खेत बहुमुखी क्याम्पसमा स्नातकोत्तर अध्ययनरत उनको टिकटकमार्फत भुपेन्द्रसँग चिनजान भएको हो । त्यतिबेला भुपेन्द्रको ‘पोस्टिङ्ग’ सुर्खेतमै भएकाले उनीहरुको भौतिकरुपमा पनि भेटघाट हुन थाल्यो । प्रेम सम्बन्धमा रहेका दुबै ‘लिभिङ टुगेदर’ मा बसे । पछि भुपेन्द्र सरुवा भएर सर्वोच्च आए । सराकुमारी पनि निम्न माध्यमिक तहसम्म पढाउने शिक्षक लाइसेन्सको परीक्षा दिन काठमाडौं आइन्।
सराकुमारीका अनुसार त्यसपछि उनी भुपेन्द्रकै कोठामा बसिन् । त्यसक्रममा भूपेन्द्रले ‘विवाह गर्छु’ भनेर पटक–पटक शारीरिक सम्बन्ध राखेको र आफू गर्भवती भएको उनको भनाइ छ । तर, त्यसपछि उनीहरुको सम्बन्ध राम्रो हुन सकेन । भुपेन्द्रको कुटाइबाट आफ्नो गर्भ खेर गएको सराकुमारीको आरोप छ।
आफूसँग शारीरिक सम्बन्ध राखेर छोडिदिएपछि सराकुमारीले सुर्खेत जिल्ला अदालतमा ‘बलात्कार’ मुद्दा दायर गरेकी थिइन् । न्यायाधीश मनोजकुमार श्रेष्ठको इजलासले भुपेन्द्रलाई धरौटीमा रिहा गर्न आदेश दियो । जिल्लाको आदेशविरुद्ध उनले उच्च अदालत, पाटनमा रिट दायर गरिन् । उच्चले पनि भुपेन्द्रलाई पुर्पक्षका लागि थुनामा पठाउन नमिल्ने भनि मिसिल सर्वोच्च पठाएको छ।
उनले ‘प्रेम सम्बन्धमा पारी विवाहको आश्वासन दिई बलात्कार गर्ने निलम्बित प्रहरी जवान भुपेन्द्र सिंह ठगुन्नालाई कारबाही गर’,‘पटकपटक भ्रुण हत्या गराई म मेरो बच्चामाथि अन्याय गर्ने अपराधीलाई कानुनबमोजिम सजाय गर’,‘अदालतको इजलासमा नै म पीडितमाथि अपशब्द प्रयोग र धम्की दिने सुर्खेत जिल्ला अदालतको न्यायाधीश मनोजकुमार श्रेष्ठलाई अनुसन्धानगरी कारबाही गर’,लगायतका माग राखेकी छिन् ।
टिप्पणीहरू