ऋण नतिर्ने मन्त्री, जदौ गर्ने हाकिम

ऊर्जा, जलस्रोत तथा सिन्चाइ मन्त्रीमा नियुक्त संखुवासभाका दिपक खड्का शीतल निवासबाट पदभार ग्रहणका लागि दिउँसो मन्त्रालय पुग्दा मूल ढोकामा फूलमाला र खादा बोक्ने कर्मचारीको भीड थियो । उक्त भीडमा राष्ट्रिय वाणिज्य बैंकका प्रमुख कार्यकारी अधिकृत देवेन्द्ररमण खनाल पनि खादा बोकेर उभिएका थिए । सामान्यतया बैंक तथा अन्य असम्बन्धित निकायका कर्मचारीहरु मन्त्रीलाई स्वागत गर्न मन्त्रालयको ढोकामा खादा र माला बोकेर उभिने गर्दैनन् तर सिंहदरबारमा वाणिज्य बैंकका सिईओले स्वार्थ जोडिएका मन्त्रीलाई स्वागत गर्दा धेरैले अचम्म मानेका छन् ।

हुन तः खड्का पछिल्लो समय जलविद्युत र होटल लाइनमा ठूलै लगानीकर्ता मानिन्छन् । उनको धेरैजसो निर्माणाधीन जलविद्युत परियोजना र ठूला होटलमा राष्ट्रिय वाणिज्य बैंकको लगानी छ । यो हिसाबले हेर्दा राष्ट्रिय वाणिज्य बैंक ऋणदाता हो भने खड्का ऋणी ।  खड्का मन्छियाम हाइड्रोपावर र लाङटाङ भोटेकोशी हाइड्रोपावर कम्पनीका संस्थापक अध्यक्ष हुन् । मन्छियामले संखुवासभामा दुई वटा जलविद्युत उत्पादन गरिरहेको छ । ४.७२ मेगावाटको माथिल्लो पिलुवा खोला २ र ७.७० मेगावाटको तल्लो पिलुवा खोला १ मा विभिन्न बैंकले लगानी गरेका छन् । त्यसमध्ये वाणिज्य बैंक एक हो जसको लिड विनोद चौधरीको नबिल बैंकले गरेको अवस्था छ ।

यस्तै हालत रसुवाको लाङटाङ भोटेकोशी हाइड्रोपावरमा पनि छ । उक्त कम्पनीको ९० प्रतिशत सेयर खड्काले चिनियाँ कम्पनीलाई बिक्री गरिसकेका छन् । खड्काले काठमाडौंको बूढानीलकण्ठमा पाँचतारे होटल बनाइरहेका छन् । आगामी केही महिनाभित्र उद्घाटन हुने उक्त होटलमा डेढ अर्ब रुपैयाँ वाणिज्य बैंकको लगानी छ । धुलाबारीमा समेत उनको यस्तै होटल निर्माणाधीन छ । उनी स्वतन्त्र ऊर्जा उत्पादकहरुको संस्था (इप्पान) का सल्लाहकार हुन् । सिइओ खनालले भने आफू वैकल्पिक ऊर्जा प्रवर्धन केन्द्रको सञ्चालक समिति सदस्यका हैसियतमा मन्त्रीको स्वागत गरेको बताए । जनआस्थासँगको कुराकानीमा भने, ‘ऊर्जामन्त्री उक्त केन्द्रको अध्यक्ष हुने व्यवस्था छ । म वित्तीय क्षेत्रको प्रतिनिधिको रुपमा सञ्चालक समिति सदस्य छु ।’

(साभार:जनआस्था साप्ताहिकबाट)