जिबीलाई समात्ने पत्र फेरि गृहमा

पोखराको सूर्यदर्शन, बुटवलको सुप्रिम, काठमाडौँको स्वर्णलक्ष्मीलगायत दर्जनौँ सहकारीको रकम हिनामिना गरी विदेश भागेका जिबी राईलाई समात्न प्रहरी फेरि तातेको छ । गृहको नेतृत्व फेरिएसँगै मलेसियामा रहेका जिबीलाई नेपाल ल्याउन सहजता महसुस गरेको प्रहरीले त्यसतर्फ तयारी थालेको हो ।  

नेपाल प्रहरीले यसअघिका गृहमन्त्री रवि लामिछानेलाई इन्टेलिजेन्सतर्फका २ जना अफिसरको मलेसिया जाने बजेटसहित प्रवन्ध मिलाइदिन आग्रह गरेको थियो । यसनिम्ति जेठ दोस्रो साता गृहलाई औपचारिक पत्रसमेत लेखिएको थियो । तर, आफू गृहमन्त्री भए २ दिनमा जिबीलाई समातेर नेपाल ल्याउने च्यालेञ्ज गरेका रविले उक्त पत्रको जवाफ दिएनन् । उल्टै २ महिनासम्म घर्रामा थन्क्याएर राखिदिए । 

सहकारी ठगी प्रकरण छानबिनका लागि संसदीय समिति गठनको मागसहित लगातार संसदमा आवाज उठाएका रमेश लेखक अहिले गृहमन्त्री छन् । उनकै निर्देशनमा गृहले सहकारी ठगेर विदेश फरार भएका १८ जना अभियुक्तलाई पक्राउ गर्ने तयारी थालेपछि प्रहरीले पुनः सोही व्यहोराको पत्र पठाएको छ । 

उच्च प्रहरी स्रोतका अनुसार त्यसबेला रविले लुकाएको पत्रकै व्यहोरा उल्लेख गरी गृहलाई पठाइएको हो । पत्रमा ‘मलेसिया सरकार र त्यहाँको प्रहरीसँग समन्वय गरेर जिबीलाई समात्न आवश्यक पहलकदमी गर्नुपर्ने हुनाले दुई जना प्रहरी कर्मचारीलाई मलेसिया जानको लागि स्वीकृतार्थ......’  भन्ने व्यहोरा छ । 

साथै, प्रहरीसँग यथेष्ट बजेट नभएकाले त्यसको समेत प्रबन्ध गरिदिन आग्रह गरिएको बताइएको छ । यसअघि गृहबाट पत्रको जवाफ नआएपछि मलेसिया जान रोकिएको प्रहरी टोली यसपटक भने त्यस्तो नहुनेमा विश्वस्त देखिन्छ । 

यता, संसदीय छानविन समितिले सहकारीको रकम हिनामिना गरी विदेश भागेका १८ अभियुक्तलाई पक्राउ गर्न गृहलाई निर्देशन दिएको छ । जसमा रवि लामिछानेका तत्कालीन व्यावसायिक साझेदार जिबीसहित १८ जनाको नाम किटान गरिएको छ ।

बेचनलाई भारतबाट समातेर भित्र्याउँदाको वृत्तान्त 

सत्ता राजनीतिलाई नै उथलपुथल पार्ने गरी गिरफ्तारीमा परेका बेचन झा कसरी प्रहरीको फन्दामा परे र उनलाई भारतबाट काठमाडौँसम्म ल्याउँदा के–कस्ता नयाँ–नयाँ विधि र प्रक्रिया अपनाइयो भन्ने विषय निकै रोचक छ । नक्कली भुटानी शरणार्थी प्रकरणका आरोपित झालाई काठमाडौँबाटै पक्राउ गरिएको भनिए पनि खासमा नयाँदिल्लीबाटै उठाइएको समाचार स्रोतले बताएको छ । २०७९ चैतमा शरणार्थी प्रकरणका आरोपीहरू पक्राउ पर्न थालेपछि फरार रहेका बेचन भारतले नेपाल प्रहरीलाई सिधै बुझाएको भने होइन । 

सुदूरपश्चिममा तैनाथ नेपाल प्रहरीका डिआइजीलाई समेत थाहै नदिई तत्कालीन गृहमन्त्री रवि लामिछाने र विशेष व्युरोका डा. मनोज केसीको पहलमा ल्याइएको स्रोतको दाबी छ । सिंहदरबार प्रहरीको हिरासतमा रहेका झाले अग्लो कदका ३ जना मानिसले उठाएको र नेपालको बोर्डरमा ल्याएर यताको सशस्त्र प्रहरीलाई बुझाएको बताउँदै आएका छन्् । उनी बस्दै आएको घरबाटै समातिएको भन्नेचाहिँ पक्का भएको छ । यस प्रकरणमा देखिएको सबैभन्दा ठूलो फरकचाहिँ के भने अहिलेसम्म कुनै पनि अपराधीलाई भारतबाट समातेर ल्याउनेले नै काठमाडौँसम्म पुर्‍याउने र जिम्मा दिने गर्दै आएका थिए । तर, बेचनलाई पक्राउ गर्नेले दिल्लीदेखि ७ सय किलोमिटर गाडीमा कुदाएर सीमाबाटै अर्कैलाई जिम्मा दिए । उताका प्रहरीले ल्याएर सशस्त्रलाई बुझाउने कुराको त कहिल्यै कल्पनासमेत गरिन्नथ्यो । यसरी ल्याइएका बेचनलाई भने पश्चिमको गड्डाचौकी सीमास्थित सशस्त्रको जिम्मा लगाइयो । सो चौकीका डिएसपी रामेश्वर श्रेष्ठले बुझेर गल्छीसम्म ल्याएका हुन् । 

यो क्रममा तत्कालीन गृहमन्त्री रवि लामिछानेले सुदूरपश्चिम प्रदेशका सशस्त्र डिआइजी दीपक अधिकारीलाई आदेश दिएपछि उनकै पहलमा सशस्त्रले बुझेको बताइन्छ । यदि, त्यसो नहुँदो हो त सशस्त्र प्रहरीले यसरी नेपाल प्रहरीले गर्दै आएको कामको जिम्मा लिँदैनथ्यो । यहाँ त उसले जिम्मा लिएको मात्र होइन कि धादिङको गल्छीसम्म ल्याएर डिएसपी दिपेश बस्यालको टोलीलाई जिम्मा लगाएको पाइयो । सो टोलीमा सई माधव थापासहित पाँच जना थिए । 

यी सबै विवरण हेर्दा बेचनलाई गृहमन्त्रीकै सक्रियतामा पक्राउ गरिएको बुझ्न गाह्रो छैन । यसमा विशेष ब्युरोका डिआइजी डा. मनोज केसी र भारतीय खुफिया एजेन्सी ‘रअ’को समेत सक्रियता आशंकित छ । यसका लागि मुकुल ढकालले भनेझैँ गृहमन्त्रीले गरेको भेटघाटमा दुवै पक्षले अफर मागेर लेनदेन गरेको आशंका गर्न थालिएको छ । त्यसबाहेक जिबी राईमा केन्द्रित राजनीतिलाई अर्कैतर्फ मोड्नुपर्ने बाध्यता पनि रविलाई थियो । कम्तीमा थप एक वर्ष प्रचण्ड – रविको सरकार चल्छ भन्ने विश्वासमा डिआइजी केसीले आँखा चिम्लिएर साथ दिएको चर्चा नेपाल प्रहरीको विशेष ब्युरोमा छ । अर्को चैतसम्म सिआइबीका हाकिम श्यामलाल ज्ञवालीलाई आइजी दिएर त्यसपछि सीधै उनको पदमा पुर्‍याउने भन्ने लोभ देखाएपछि केसी हौसिएको बताइन्छ । त्यसबेलाको योजनामा संलग्न एक पात्रका अनुसार बेचनबाट बयान लिएर सोही आधारमा नक्कली शरणार्थी प्रकरणमा देउवापत्नी आरजु राणालाई समेत पक्राउ गर्ने तयारी थियो ।

उता, ओलीलाई पनि साइजमा राख्न उनका पिए राजेश बज्राचार्यलाई समेत हिरासतसम्म पुर्‍याउने प्लान बनेको थियो । समाचार स्रोत भन्छ – त्योबेला रवि लामिछानेले नबुझेको कुरा के भयो भने नेपाल प्रहरीमा रास्वपाका होइन एमाले–कांग्रेसका कार्यकर्ता बढी छन् र उनीहरूले आफ्ना नेताको रक्षा वा स्वार्थ सिद्धलाई प्राथमिकतामा राख्ने गर्छन् । यसरी गृह मन्त्रालयको योजनामा प्रहरीका केही हाकिमले गरेको तयारीबारे पलपलको खबर बालकोट र बूढानीलकण्ठमा पुगिरहेको थियो । त्यसैले १३ गते बेचनलाई काठमाडौँ ल्याइएपछि १४ गते सबै योजना एमाले–कांग्रेसका शीर्ष नेताले थाहा पाएर असार १५ गते दहीच्युरा खान देउवाको जोडी नै बालकोट पुग्यो । त्यही साँझ नयाँ सहमति जुट्यो । जुन १७ गते नयाँ गठबन्धन निर्माणको सम्झौताका रूपमा प्रकट भयो ।

(साभार:जनआस्था साप्ताहिकबाट)