गुडिरहेको बसमाथि ढुंगा खस्यो, दुई दर्जन घाइते

चितवनको नारायणघाट–मुग्लिङ्ग सडकखण्डमा गुडिरहेको यात्रुवाहक बसमाथि ढुंगा खस्दा दर्जनौं घाइते भएका छन् । 

भरतपुर महानगरपालिका–२९ स्थित १७ किलोमा आज दिउँसो भएको यो दुर्घटनामा २५ जना यात्रु घाइते भएको प्रहरीले जनाएको छ । घाइतेमध्ये दुई जनाको अवस्था गम्भीर रहेको जिल्ला प्रहरी कार्यालय चितवनका प्रहरी नायब उपरीक्षक (डिएसपी) भेषराज रिजालले बताए । 

घाइते नौ जनाको भरतपुर अस्पताल, पुरानो मेडिकल कलेज र चितवन मेडिकल कलेजमा आठ-आठ जनाको उपचार भइरहेको उनले जानकारी दिए । 

आज दिउँसो २ बजेतिर रौतहतको गौरबाट पोखरा जाँदै गरेको ग २ ख ४७ नम्बरको यात्रुवाहक बसमा ढुंगा खसेको थियो । त्यसपछि चालक आत्तिएर बस अनियन्त्रित भई सडकमै पल्टिएको डिएसपी रिजालले बताए । 

‘बसमा ३४-३५ जना रहेको खुल्न आएको छ । चार जनालाई केही भएको रहेनछ । २५ जना घाइतेको उपचार भइरहेको छ,’ उनले भने, ‘बाँकीको पनि उद्दार कार्य जारी रहेको छ ।’