सहकारी ठगीमा रविको संलग्नता पुष्टि, हस्ताक्षरपछि प्रतिवेदन बुझाईंदै

सहकारी ठगीसम्बन्धी संसदीय छानबिन विशेष समितिले गोर्खा मिडिया नेटवर्कका तत्कालीन प्रबन्ध निर्देशक, पूर्व गृहमन्त्री तथा रास्वपा सभापति रवि लामिछानेसहितलाई दोषी ठहर गरेको छ । समितिले तयार पारेको प्रतिवेदनमा सातै जना सदस्यहरुले बिहान ११ बजे हस्ताक्षर गरेपछि दिउँसो १ बजे सभामुख देवराज घिमिरेलाई बुझाउने तयारी छ । 

छानबिन समितिको हिजो बिहान १० बजेदेखि आज बिहान ३ बजेसम्म बसेको बैठकले उक्त निर्णय गरेको छ । गोर्खा मिडिया नेटवर्कका अध्यक्ष गितेन्द्रबाबु–जीबी राई, प्रबन्ध निर्देशक लामिछाने र सञ्चालक छविलाल जोशीले केवाईसी फर्म भरेर चेकमा हस्ताक्षर गरेको, दुई वटा बैंकमा संयुक्त खाता सञ्चालन गरेको भेटिएपछि ठगीमा लामिछानेको प्रत्यक्ष संलग्नता पाइएको बताइन्छ । 

उनीहरुले गोर्खा मिडियाको चेकमा पटक पटक हस्ताक्षर गरेर खर्च गरेको प्रमाणसमेत समितिले जुटाएपछि लामिछानेको ठगी पुष्टि गरिएको हो । लामिछानेले कम्पनीका सबै आधिकारिक कागजातामा हस्ताक्षर गरेको देखिन आएको छ । उनले सहकारीको रकमबाट कम्पनीमा सेयर लगानी गरेकोमा पनि समितिले ठहर गरेको छ ।