ईसीडी सुधारका लागि नेत्रको एकल प्रदर्शन

प्रारम्भिक बाल विकास (ईसीडी) लाई व्यवस्थित गर्न माग राख्दै बाबुराम भट्टराई नेतृत्वको पार्टीका विद्यार्थी अध्यक्ष नेत्र चापागाईंले दोस्रो चरणको आन्दोलन शुरु गरेका छन् । 

यसअघिको सहमति कार्यान्वयनमा सरकारले चासो नदेखाएको भन्दै उनले पोखराबाट दोस्रो चरणको प्रदर्शन थालेका हुन् । आइतबारदेखि प्रदर्शन गरिरहेको चापागाईंले बताए । 

दुई दिन पोखरामा प्रदर्शन गरेका उनले मंसिर १३ र १४ गते धनगढी अनि १५ र १६ गते नेपालगञ्जमा प्रदर्शन गर्ने जानकारी दिए । ‘हामी सातै प्रदेशमा प्रदर्शन गर्छौं । अन्तिममा हेटौंडामा प्रदर्शन गर्ने तयारी छ । त्यति गर्दापनि माग सुनुवाई नभएमा हामी राजधानी केन्द्रित प्रदर्शन गर्छौं’,उनले भने । 

चापागाईंले ईसीडीमा भौतिक संरचना, सिकाई सामाग्री, उपयुक्त पाठ्यक्रमका लागि बजेट विनियोजन गर्न, खाजा रकम प्रतिविद्यार्थी ५० रुपैयाँ पुर्याउन, ईसीडीमा कार्यरत शिक्षक तथा कर्मचारीलाई बालमनोविज्ञान, केयर गिभर र मन्टेश्वरीसम्बन्धी तालिमको व्यवस्था गर्नलगायतका माग राख्दै गत जेठमा काठमाडौंको माइतीघर मण्डलामा एकल प्रदर्शन गरेका थिए । 

राष्ट्रिय स्वतन्त्र पार्टी (रास्वपा) सांसद् तथा तत्कालीन शिक्षा, विज्ञान तथा प्रविधिमन्त्री सुमना श्रेष्ठले उनको माग कार्यान्वयन गर्ने सम्झौता गरेकी थिइन् । तर, माग कार्यान्वयन नभएपछि उनले पुनः प्रदर्शन थालेका हुन् ।