डिभीको आडमा छोरो युवती छान्दै, आमा सम्पत्ति स्याहार्दै

विवाह गरेको केही महिनामै डिभी परेर अमेरिका छिरेका श्रीमान् परस्त्रीसँग लागेको थाहा पाएपछि एउटी युवतीको मस्तिष्कले के सोच्छ ? यस्तै अवस्था लमजुङकी सिर्जना भण्डारीले व्यहोरेकी छन् । 

सन् २०२० मा विष्णुबहादुर बस्नेत र ती महिलाले अमेरिकामै सम्बन्धविच्छेद गरेको देखिन्छ । श्रीमान् अर्कीसँग लागेको थाहा पाएकी सिर्जनाको बेसीशहरको घरजग्गा आफ्नो र सासुको संयुक्त नाममा पास गरिदिनुपर्ने शर्तलाई विष्णुले हालसम्म स्वीकारेका छैनन् । 

जथाभावी सम्बन्ध राख्दै हिँडेका पुरुषले उल्टै आफ्नो गला र हातमा लगाएको सुनका गहना खोसेको उनी बताउँछिन् । आफूमाथि जबरजस्ती करणी गर्न खोजेपछि दिदीको घरमा गएर बसेको सिर्जनाको जिकिर छ । त्यहाँ पुगेरसमेत त्यस्तै रवैया देखाउन थालेपछि उनले प्रहरी कार्यालय गुहारेकी हुन् । 

यता आफूविरुद्ध जाहेरी परेकै रात विष्णु अमेरिका उडे । प्रहरीको रेकर्डमा उनी फरार देखिन्छन् । सिर्जनाले मानापाथी चामल भराईपाउँ भन्दै लमजुङ जिल्ला अदालतमा मुद्दा दायर गरेकी छन् । आफूलाई सम्पत्ति दिनुपर्ने भएपछि सासु र उनका छोराले धमाधम सम्पत्ति बेच्न थालेपछि रोक्का गराएको सिर्जनाले बताइन् ।
भण्डारीले जनआस्थामा हालै प्रकाशित ‘अमेरिकाबाट फर्कनासाथ पतिलाई आपत’ र ‘करणी काण्ड त कति हुन् कति !’ शीर्षकको समाचारप्रति गम्भीर आपत्ति जनाएकी छन् । पीडितलाई थप पीडा पुग्नेगरी समाचार प्रकाशित भएको सिर्जनाको भनाइ छ । 

राजीखुशी, सामाजिक रीतिरिवाजअनुसार बेसीशहर नगरपालिका–७ का विष्णुबहादुर बस्नेतसँग सात वर्षअघि लगनगाँठो कसेकी मर्स्याङ्दी गाउँपालिकाकी उनको दाम्पत्य जीवनबारे लेखिएको समाचारले आफ्नो भावनामा गम्भीर चोट पुगेको सिर्जनाले बताइन् ।