कन्सर्ट बिथोल्ने सुईंको पाएपछि हजारौं सुरक्षाकर्मी परिचालन

संविधान दिवसको अवसरमा आज साँझ दरबारमार्गस्थित नारायणहिटी गेटमा आयोजना हुने ‘नेशनल डे कन्सर्ट’को सुरक्षाका लागि ठूलो संख्यामा प्रहरी परिचालन गरिएको छ । 

कन्सर्टमा सहभागी हुने विशिष्ट व्यक्ति, कलाकार र सर्वसाधारणको सुरक्षा प्रबन्ध मिलाउन नेपाल प्रहरी र सशस्त्रका करिब चार हजार फौज सडकमा तैनाथ गरिएको छ । काठमाडौँ प्रहरी प्रमुख एसएसपी वसन्त रजौरेले सादा पोशाकका सुरक्षाकर्मी पनि खटाइएको जानकारी दिए । 

संविधानविरोधी शक्तिहरु कन्सर्ट बिथोल्ने योजनामा रहेको सुईंको पाएपछि प्रहरीले हिजैदेखि सो क्षेत्रको सुरक्षा व्यवस्था कडा बनाएको बताइन्छ । संविधानविरुद्ध आक्रामक अभिव्यक्ति दिँदै आएका राजावादी दल राप्रपाका अध्यक्ष राजेन्द्र लिङ्गदेन, राष्ट्रिय मुक्ति क्रान्तिका संयोजक राजेन्द्र महतोलगायतका गतिविधिलाई नोटिसमा राखेको प्रहरीले बताइसकेको छ । 

अपरान्ह ४ बजेबाट शुरु हुने कन्सर्टमा प्रधानमन्त्री केपी शर्मा ओलीसहित उच्च पदस्थहरु सहभागी हुँदैछन् । प्रधानमन्त्री ओली साढे ६ बजे त्यहाँ पुग्ने कार्यक्रम छ । 

कन्सर्टमा काठमाडौँ महानगरपालिका मेयर बालेन साहका समर्थकहरु पनि सहभागी हुने प्रहरीको अनुमान छ । अस्ति इन्द्रजात्रा बिथोलेको आरोपमा वसन्तपुरबाट बालेनको तस्बिर अंकित टिशर्ट लगाएका केही समर्थकलाई प्रहरीले नियन्त्रणमा लिएको थियो ।

कन्सर्टमा गायक प्रमोद खरेल, सुगम पोखरेल, कुन्ति मोक्तान, स्वप्न सुमनलगायतका राष्ट्रिय कलाकारले प्रस्तुति दिनेछन् । त्यस्तै, दी एलिमेन्ट ब्याण्ड र कुटुम्बको पनि प्रस्तुति रहने बताइएको छ ।