रविले बुझेको ८१ लाख ससुरालीमा स्वाहा

राष्ट्रिय स्वतन्त्र पार्टीका सभापति रवि लामिछानेले गोर्खा मिडिया नेटवर्कको तत्कालीन महानिर्देशक हुँदा ससुरालीको कम्पनीलाई ८१ लाख पठाएको पाइएको छ । संसदीय छानबिन समितिले सार्वजनिक गरेको प्रतिवेदनमा गोर्खा मिडिया,बालुवाटारबाट गोपीकृष्ण मुभिजका नाममा गरी दुई पटक ८१ लाख २५ हजार पेश्की गएको उल्लेख छ । 

आर्थिक वर्ष २०७७/७८ मा २५ लाख र आर्थिक वर्ष २०७८/ ०७९ मा ६६ लाख २५ हजार पेश्की बुझेको गोपीकृष्ण मुभिज भने अहिले बन्द छ । सात वटा पर्दा भएको उक्त हलको ठाउँमा पाँचतारे होटलसहितको बिजनेस कम्प्लेक्स बनाउने भनिएको थियो । सोहीबमोजिम शुरुमा चार वटा हल भत्काइयो । गत वर्ष फागुनदेखि यो हल पूर्णरुपले बन्द छ ।

राप्रपा नेता समेत रहेका उद्धव पौडेलले २०५२ सालमा गोपीकृष्ण खोलेका थिए । उनी निकिता पौडेल लामिछानेका बाबु हुन् । निकिताले रविसँग बिहे गरेपछि गोपीकृष्णको कारोबार निरक पौडेलले हेर्न थाले । निकिता अहिले नारी टिभीसँग सम्बन्धित छिन् ।