नयाँ दिल्लीको खुफिया बैठकमा सामेल भयो नेपाली गुप्तचर टोली

राष्ट्रिय अनुसन्धान विभागका प्रमुख हुतराज थापा नेतृत्वको टोली भारतीय खुफिया एजेन्सी ‘रअ’को सम्मेलनमा सहभागी हुन भारतको राजधानी नयाँ दिल्ली पुगेको छ । 

गुप्तचर टोली आज दिउँसो दिल्ली पुगेको हो । नेपाल एयरलाइन्सको उडान नम्बर आरए–२१७ मा हुतराज र विभागका उपअनुसन्धान निर्देशक प्रकाश आचार्य काठमाडौंबाट गएका हुन् ।  

नयाँ दिल्लीस्थित ‘रअ’को मुख्यालयमा आजदेखि ‘आतंकवादविरुद्ध दक्षिण–पूर्वी एसियाली मुलुकका खुफिया एजेन्सीका प्रमुखहरुको सम्मेलन’ शुरु भएको छ । सम्मेलन आगामी शनिबारसम्म हुने छ । 

उक्त वार्षिक बैठकमा सहभागी हुन ‘रअ’ प्रमुख रवि सिन्हाको निमन्त्रणामा हुतराज दिल्ली पुगेको जनाइएको छ ।