यता पर्न थाल्यो उता फैलाइएको आतंकको प्रभाव

अन्तराष्ट्रिय उडान भर्ने भारतीय वायुसेवा कम्पनीका विमानमा बम राखेको एकपछि अर्को भ्रमपूर्ण सूचनाका कारण भारतीय हवाइ सेवामा गम्भीर प्रभाव परेको छ । यसबाट पछिल्लो एक महिनामा चार अर्ब भारतीय रुपैयाँ नोक्सानी व्यहोर्नुपरेको जनाइएको छ । 

देशका विभिन्न विमानस्थलबाट अन्तराष्ट्रिय उडान भर्न लागेका र उडिरहेका जहाजमा बम राखिएको गलत सूचना फैल्याइएपछि हवाई कम्पनीहरु समेत त्रसित छन् । भारतको उड्ययन मन्त्रालयलाई उद्धृत गर्दै दैनिक भाष्करले जनाएको छ, ‘सात सयभन्दा बढी जहाजले यात्रुलाई विभिन्न गन्तव्यमा पुर्याइरहेका छन् । तर, बम राखेको गलत सूचनाका कारण गत जुनदेखि अहिलेसम्म १३ सय करोड क्षति पुगेको छ ।’ 

जुन महिनामा एकैदिन ४३ वटा जहाजमा बम राखेको हल्ला फैलाइयो । त्यसबाट इन्डिगो एयर, अकाश एयर, भिस्तारा एयरसहित दर्जनौँ वायुसेवा कम्पनीले उडान रोकेका थिए भने कतिपयलाई तत्काल डाइभर्ट गरिएको थियो । 

गत शुक्रबार पनि इण्डिया एक्सप्रेस र भिस्तारा एयरलाइन्सको विमानमा बम राखेको सूचना फैल्याइयो । लण्डन उडेको भिस्ताराको विमानलाई फ्याङ्कफर्ट र इण्डिया एक्सप्रेसको विमान जयपुर डाइभर्ट गरिएको थियो । पछिल्लो दुई सातामा भारतबाट विभिन्न गन्तव्यमा उडान भरेका र भर्न ठिक्क परेका डेढ सयभन्दा बढी विमानमा बम राखिएको हल्ला फैलाइएको छ ।

यसैबीच आज नयाँ दिल्लीबाट काठमाडौंका लागि उडेको भिस्तारा एअरको विमानमा पनि बमको हल्ला फैलाइयो । तर, जहाज त्रिभुवन अन्तर्राष्ट्रिय विमानस्थलमा साढे ४ बजे सकुशल अवतरण गरेको थियो ।