सुतेकै बेला हात्ती आक्रमण,वृद्दको गयो प्राण

रौतहटमा जंगली हात्तीको आक्रमणबाट एक वृध्दाको ज्यान गएको छ । गएराति सुतिरहेको अवस्थामा जंगली हात्तीले आक्रमण गर्दा ७० वर्षीया पातलीमाया घिसिङ्गको मृत्यु भएको हो । 

फतुवा विजयापुर नगरपालिका–११, रागी बुटुवाकी घिसिङ्ग श्रीमान् बुद्धिमान दोंगसँग बस्दै आएकी थिइन् । श्रीमानले भने भागेर ज्यान जोगाएको जिल्ला प्रहरी कार्यालय, रौतहटका सूचना अधिकारी प्रहरी निरीक्षक उमाशंकर प्रसादले बताए । 

‘एकान्तमा फुसको घर रहेछ । राति जंगली हात्तीले आक्रमण गरेपछि श्रीमान् भाग्नुभएछ । उहाँको मृत्यु भएको छ । पोस्टमार्टमपछि  शव परिवारको जिम्मा लगाइएको छ । उहाँको घर पुरै तोडफोड भएको छ’,उनले भने । 

उनका अनुसार ईलाका प्रहरी कार्यालय फतुवा विजयपुरले घटनाबारे अनुसन्धान गरिरहेको छ ।