चिनियाँ राष्ट्रपतिद्वारा ट्रम्पलाई बधाई, इतिहासको वस्तुनिष्ठ समीक्षा गर्न आग्रह

अमेरिकाको राष्ट्रपतिमा निर्वाचित भएपछि डोनल्ड ट्रम्पलाई विश्वभरका नेताहरुले बधाई दिने क्रम जारी छ । चिनियाँ राष्ट्रपति सी जिनफिङले हिजो पठाउनुभएको बधाई सन्देशमा चीन र संयुक्त राज्य अमेरिकाले सहयोगबाट फाइदा उठाउने तर मुठभेडबाट पीडित भएको वास्तविक इतिहासतर्फ संकेत गर्नुभएको छ ।

उहाँले ट्रम्पको आगामी कार्यकालमा बेइजिङ र वासिङ्टनबीच सहकार्यका उपाय खोज्नुपर्नेमा जोड दिनुभएको छ । सन्देशमा भनिएको छ, ‘स्थिर, स्वस्थ र दिगो चीन–अमेरिका सम्बन्ध दुवैको साझा हितमा छ । साथै यो अन्तर्राष्ट्रिय समुदायको अपेक्षा अनुरूप पनि छ ।’

राष्ट्रपति सीले अमेरिकालाई ‘संवाद र सञ्चारलाई मजबुत बनाउन’ र ‘मतभेदको उचित व्यवस्थापन’ गर्न आग्रह गर्दै नयाँ युगमा विश्वका प्रमुख दुई ठूला अर्थतन्त्रले उपयुक्त मार्ग रोज्नुपर्नेमा जोड दिनुभएको उल्लेख छ ।

यसअघि निर्वाचन प्रचारको क्रममा ट्रम्प र प्रतिद्वन्द्वी तथा वर्तमान उपराष्ट्रपति कमला ह्यारिस दुवैले बेइजिङसँगको व्यापारमा कडा कदम चाल्ने भन्दै मतदाताबीच वाहवाही मच्चाएका थिए । ट्रम्पले अमेरिका प्रवेश गर्ने सबै चिनियाँ सामानमा ६० प्रतिशतसम्म कर लगाउने घोषणा गरेका छन् ।