चिफ अफ स्टाफमा चुनावी म्यानेजर, अवैध आप्रवासीलाई हटाइने ट्रम्पको प्रतिबद्धता

नवनिर्वाचित अमेरिकी राष्ट्रपति डोनल्ड ट्रम्पले अवैध आप्रवासीलाई आफ्नो सरकारले हटाएरै छाड्ने बताउनुभएको छ । निर्वाचनमा विजयी भएपछि दिइएको अन्तर्वार्तामा उहाँले चुनावी वाचा तत्काल पूरा गर्ने प्रतिबद्धताअन्तर्गत उक्त कार्य अगाडि आएको छ । 

ट्रम्पले आफूले सत्ता सम्हालेपछि अवैध आप्रवासीलाई तत्काल उनीहरुकै देशमा फर्काउने र मेक्सिकोसँगको सीमानालाई थप बलियो बनाउने आफ्नो प्राथमिकतामा रहेको उल्लेख गर्नुभएको छ । 

एनबीसी न्यूजसँगको अन्तर्वार्तामा उहाँले अवैध आप्रवासीलाई अमेरिकाबाट निकाला गरिने कुरोलाई प्राथमिकताकासाथ राख्नुभएको हो । उहाँको निश्कर्ष छ, ‘आप्रवासीका कारण अमेरिकामा हत्या हिंसा बढ्यो । लागूऔषध कारोबारीहरुले अमेरिका र अमेरकीलाई नष्ट गर्दैछन् ।’

यसबीच ट्रम्पले ह्वाइट हाउसको चिफ अफ स्टाफमा सुसी विल्सलाई नियुक्त गर्नुभएको छ । सुसी ट्रम्पको चुनावी अभियानकी मेनेजर हुन् । उनी अमेरिकी इतिहासमा ह्वाइट हाउसको चिफ अफ स्टाफ नियुक्त हुने पहिलो महिला बनेकी छन् । अमेरिकामा ४७ औं राष्ट्रपतिको रुपमा डोनल्ड ट्रम्पले आगामी जनवरी २० का दिन पदभार ग्रहण गर्दैछन् ।

को हुन् विल्स ? 

सुसी विल्स सन् १९८० को राष्ट्रपतीय निर्वाचनमा रोनल्ड रेगनको चुनावी अभियानमा सामेल भएकी थिइन् । यसअघि सन् २०१६ र २०२० को चुनावी अभियानमा उनी ट्रम्पको वरिष्ठ सल्लाहकार थिइन् । 

ह्वाइट हाउसमा कर्मचारी परिचालन, राष्ट्रपतिको भेटघाट र कार्यक्रम तय, अन्य सरकारी निकायसँग समन्वय गर्ने अधिकारीको रुपमा लिइने भएकाले चिफ अफ स्टाफलाई राष्ट्रपतिको गेट किपर भन्ने गरिन्छ ।

६७ वर्षीया विल्स फ्लोरिडामा राजनीतिक रणनीतिकारको रुपमा लामोसमयदेखि सक्रिय छन् । यसअघिको कार्यकालमा राष्ट्रपति ट्रम्पले चार जना चिफ अफ स्टाफ फेर्नुभएको थियो ।

विल्ससँगै ट्रम्पको चुनावी अभियानका अर्का म्यानेजर क्रिस ला सिभिटा हुन् ।