भोलि चीन जाने एमालेको जम्बो टोलीमा को-को सामेल ?

एमाले वरिष्ठ उपाध्यक्ष ईश्वर पोखरेल नेतृत्वको टोली चीन जान लागेको छ । प्रधानमन्त्री तथा पार्टी अध्यक्ष केपी शर्मा ओलीको औपचारिक विदेश भ्रमणको थालनी यसपटक चीनबाट हुन लागेको सन्दर्भमा त्यसअघि नै पोखरेल नेतृत्वको टोली उता जान लागेको हो । प्रधानमन्त्री ओली मंसिर तेस्रो साता औपचारिक भ्रमणमा बेइजिङ्ग जाँदै हुनुहुन्छ ।

एमाले स्रोत भन्छ, ‘भ्रमणबारे कुरो चलिरहे पनि साइत जुरिहालेको थिएन । अहिले दुबैतिर अनुकूल समय भएकाले वरिष्ठ उपाध्यक्षको नेतृत्वमा यो भ्रमण हुन लागेको हो ।’ टोलीमा माओवादी पृष्ठभूमिका सचिव लेखराज भट्ट,कानुन व्यवसायी सानुराज पोखरेल,उपाध्यक्ष पोख्रेलका स्वकिय दिपेन्द्र श्रेष्ठ,कर्णालीका गोरखबहादुर बोगटीलगायत छन् । 

भोलिदेखि मंसिर १० गतेसम्मको यो भ्रमण चिनियाँ कम्युनिष्ट पार्टी,विदेश बिभागको निम्तोमा हुन लागेको हो । यसअघि माओवादीका ३० जनासम्मको टोलीले हरेक बर्ष चीन भ्रमण गर्दथ्यो । 
केही समयअघि एमाले महासचिव  शंकर पोख्रेल  र उपमहासचिव विष्णु रिमाल नेतृत्वका जम्बो टोलीले पनि चीन भ्रमण गरेका थिए ।