नेपालगञ्ज जाँदै गरेको जीप जाजरकोटमा दुर्घटनाग्रस्त
जाजरकोटमा भएको जीप दुर्घटनामा २५ जना घाइते भएका छन् । भेरी नगरपालिका–७ स्थित स्याउली बजारबाट नेपालगञ्जतर्फ जाँदै गरेको बा.५ख १८९२ नम्बरको जीप जिरोप्वाइन्ट नजिकै दुर्घटना भएको बताइएको छ ।
गाडी सडकबाट झण्डै ४० मिटर तल खसेको जिल्ला प्रहरी कार्यालय जाजरकोटका इन्सपेक्टर दिनेश तिमिल्सेनाले जानकारी दिए । उनका अनुसार घाइते सबैको अहिले खलंगास्थित जिल्ला स्वास्थ्य कार्यालयमा उपचार भइरहेको छ ।
चार जना गम्भीर घाइतेलाई सुर्खेत रिफर गर्ने तयारी छ । ‘एम्बुलेन्सबाट सबैलाई खलंगा ल्याएका छौ’, इन्सपेक्टर तिमिल्सेनाले जनआस्थासँग भने, ‘चार जनाको अवस्था गम्भीर छ, उनीहरुलाई हेलिकोप्टरबाट सुर्खेतको प्रादेशिक अस्पताल लैजान आवश्यक तयारी गरिएको छ ।’
प्रहरीले दुर्घटनाबारे अनुसन्धान थालिसकेको जनाएको छ ।
ट्रेन्डिङ पोस्ट
टिप्पणीहरू