रातपरेपछि महानगरको कार्यालय वरपर पार्किङ निःशुल्क

काठमाडौं महानगरपालिकाले कमलादीस्थित काठमाडौं प्लाजाको परिसरभित्र निःशुल्क पार्किङको व्यवस्था गरेको छ । आजदेखि परिसरमा निःशुल्क पार्किङ सेवा उपलब्ध गराइएको महानगरले जनाएको छ । 

उक्त सेवा साँझ साढे ५ बजेदेखि राति ११ बजेसम्म हुने छ । सो सेवाले कमलादी, कमलपोखरी, पुतलीसडक र दरबारमार्ग आसपासको सवारी साधन पार्किङमा सहज हुने महानगरको विश्वास छ । 

‘काठमाडौं महानगरपालिकाको भौगोलिक क्षेत्रअन्तर्गत कमलादी, कमलपोखरी, पुतलीसडक र दरबारमार्ग आसपासको सवारी साधन पार्किङमा सहजता ल्याउन मिति २०८१–०८–०७ गतेदेखि कमलादीस्थित काठमाडौं महानगरपालिका कार्यालय रहेको काठमाडौं प्लाजाको कार्यालय परिसरभित्र निःशुल्क रुपमा सवारी साधन पार्किङ सेवा उपलब्ध गराइनेछ । यो सेवा बेलुका साढे ५ बजेदेखि ११ बजेसम्म उपलब्ध हुने...’, प्रकाशित सूचनामा उल्लेख छ ।