रोकियो नासु र खरिदारको सरुवा

सरकारले राजपत्र अनंकित प्रथम र द्वितीय श्रेणी (नायव सुब्वा र खरिदार) तहका कर्मचारीको सरुवा स्थगन गरेको छ । संघीय मामिला तथा सामान्य प्रशासन मन्त्रालयले सबै मन्त्रालय, आयोग, सचिवालय र कार्यालयलाई परिपत्र गर्दै त्यसबारे जानकारी गराएको छ ।

बढुवा सूचना प्रकाशित हुनुअघि सरुवा गरी पठाउँदा लामो समयदेखि दुर्गम स्थानमा रहेका कर्मचारी मर्कामा पर्ने भएकाले तत्काललाई नासु र खरिदारको सरुवा स्थगन गरेको जनाइएको छ । मन्त्रालयका अनुसार नायव सुब्वा वा सो सरहका कर्मचारीको माघ मसान्तसम्म र खरिदार वा सो सरहका कर्मचारीको फागुन मसान्तसम्मका निम्ति सरुवा स्थगित गरिएको छ । 

परिपत्रमा लामो समयदेखि दुर्गम स्थानमा बसी सेवा गरी आएका कर्मचारीहरुको बढुवा प्रयोजनार्थ मर्का पर्ने देखिएको हुँदा कर्मचारीहरुको सरुवा गर्ने, कामकाज, काज खटाउने तथा सरुवा सहमति प्रदान गर्ने कार्य हाललाई स्थगित गरिएको व्यहोरा उल्लेख छ ।