चिनियाँ विमान ओर्लेपछि त्रिभुवन अन्तर्राष्ट्रिय विमानस्थलमा पोखराको उडानबारे चर्चा

सिचुआन एअरलाइन्सको चार्टर्ड विमानमा पोखरा अन्तर्राष्ट्रिय विमानस्थलमा अवतरण गरेलगत्तै काठमाडौं विमानस्थलमा पोखरामा अन्तर्राष्ट्रिय उडानबारे चर्चा गरिएको छ । मध्यान्ह साढे १२ बजेको समयमा त्रिभुवन अन्तर्राष्ट्रिय विमानस्थलको सभा हलमा ‘पोखरा अन्तर्राष्ट्रिय विमानस्थल अन्तर्राष्ट्रिय उडान गराउन सक्षम रहेको र राष्ट्रको सम्वृद्धिको लागि पोखरामा अन्तर्राष्ट्रिय उडान गरौं !’ शीर्षकमा छलफल गरिएको बताइन्छ ।

नेपाल एसोसिएसन अफ टुर एण्ड ट्राभल एजेन्ट्स (नाटा) गण्डकी प्रदेशले आयोजना गरेको कार्यक्रममा संस्थाका अध्यक्ष किशोर दाहालसहित चार दर्जनको उपस्थिति छ । गण्डकी प्रदेशका उद्योग तथा पर्यटनमन्त्री मित्रलाल बस्याल, नागरिक उड्डयन प्राधिकरण्का महानिर्देश प्रदीप अधिकारी, त्रिभुवन अन्तर्राष्ट्रिय विमानस्थलका महाप्रबन्ध जगन्नाथ निरौला पनि कार्यक्रममा पुगेको बताइन्छ । 

उता पोखरामा चीनको सिचुआन प्रान्तको राजधानी छन्तुबाट आएको सिचुआन एअरलाइन्सको विमान बिहान सवा १० बजे अवतरण गरेको थियो । विमानमा फेवातालमा आइतबार र सोमबार हुने दोस्रो अन्तर्राष्ट्रिय ड्रागन डुंगा दौड प्रतियोगिता–२०२४ का लागि आएका खेलाडी, अधिकारीहरु गरेर १२९ यात्रु चीनबाट आएका हुन् ।

गण्डकी प्रदेश सरकार, पोखरा महानगरपालिका, नेपालस्थित चिनियाँ दूतावास र नेपाल पर्यटन बोर्डको संयुक्त आयोजना तथा नेपाल ड्रागन बोट एसोसिएसन, पोखरा पर्यटन परिषद् र पोखरा ओभरसिज चाइनिज एसोसिएसनको सहआयोजनामा हुन लागेको प्रतियोगितामा नेपालका ११, चीनका आठ र सिंगापुरका एक गरी २० वटा समूहको सहभागिता छ ।