श्रीलंकाली पूर्व राष्ट्रपतिको होक्केमा बास

नेपाली काँग्रेसका सांसद तथा विवादास्पद व्यापारी विनोद चौधरीको निम्तोमा भोलि नेपाल आउन लागेका श्रीलंकन पूर्व राष्ट्रपति रनिल विक्रमासिंघे सोझै लुम्बिनी जाँदै छन् । उनलाई लुम्बिनीस्थित होक्के होटलमा बस्ने प्रबन्ध मिलाइएको छ । 

उनी केही दिन नेपाल बस्ने सम्भावना रहेतापनि कति दिन भनेर केही खुलाइएको छैन । लुम्बिनीबाहेक अन्यत्रको भ्रमणबारे पनि हालसम्म बिस्तृत जानकारी दिइएको छैन ।

श्रीलंकाका नवौं राष्ट्रपति रनिल र चौधरी व्यावसायिक साझेदार भएको बुझिएको छ । चौधरीले श्रीलंकाका होटल,बैंक तथा वित्तीय संस्थामा लगानी गरेका छन् । त्यहाँको आर्थिक अवस्था कमजोर भएको मौकामा गत वर्ष चौधरीले सिंगापुरस्थित सिजी क्यापिटल पार्टनरको नाममा युनियन बैंकको ७१ प्रतिशत सेयर खरिद गरेका थिए ।

 त्यसैगरी ताज समुन्द्र कोलम्बो होटलमा पनि चौधरीको लगानी छ । उनले तीलगायत विदेशका कुनै पनि आफ्नो लगानीबारे नेपालमा हालसम्म आधिकारिक रुपमा खुलाएका छैनन् ।