खोयाको बेवास्तापछि रवि अहिलेको हालतमा पुगेको मुकुलको खुलासा
राष्ट्रिय स्वतन्त्र पार्टी (रास्वपा)बाट निश्कासित डा. मुकुल ढकालले आफूले चाहे पार्टी फुटाइदिनसक्ने दाबी गरेका छन् । आफ्नो निर्देशनमा चार जना सांसदले पार्टी फुटाउन सक्ने उनको ठोकुवा छ ।
सभापति रवि लामिछाने सहकारी ठगी मुद्दामा पूर्पक्षका लागि थुनामा जानसक्ने आकलन भइरहँदा हालै एउटा पडकास्टमा ढकालले रास्वपामा चलिरहेको आन्तरिक गतिविधिको समीक्षा गर्दै उक्त जानकारी दिएका हुन् । रास्वपाका अधिकांश नेताहरु अझै पनि लामिछानेका गैरकानुनी गतिविधिबारे जानकार नरहेको र हल्लाको भरमा ‘प्रतिशोध’ भन्दै हिँडेको उनको जिकिर छ ।
पछिल्लो समय त्यस्ता थुप्रै नेताहरु आफ्नो विचारमा सहमत हुँदै गएको दाबी गर्दै उनले भने, ‘चार जना सांसदले पार्टी फुट्छ, मसँग त्यति सांसद हुनुहुन्छ । मैले यदि ती सांसदलाई सँगै राखेर पत्रकार सम्मेलन गरे भने कि पार्टी विभाजन हुन्छ, कि मलाई फर्काउनुपर्ने हुन्छ ।’
तर, आफैँले बनाएको पार्टी रास्वपा फुटाउने योजना नरहेको उनले बताए । भन्छन्, ‘म त अगाडिबाट हान्ने मान्छे हो, जे हो सिधा भन्ने, षड्यन्त्र गर्न, गुट बनाउन मलाई आउँदैन, किनकि मलाई पार्टीको माया छ ।’
पोखरामा सभापति लामिछानेमाथि खोया प्रहारपछि रास्वपामाथि संकट शुरु भएको पनि ढकालले खुलाएका छन् । ‘गत वर्ष पुष २७ गते उहाँ (रवि)माथि खोया हानियो । त्यसैदिन साँझ मैले उहाँलाई यो खोयाले पार्टीलाई सकाउँछ, सिरियस रुपमा लिनुपर्छ भनेर सुझाएको थिएँ । तर, उहाँले हैन हैन केही हुँदैन, सबै मिलिहाल्छ भनेर हल्का रुपमा लिनुभयो’, उनले सुनाए ।
त्यसपछि पनि पार्टीका बैठकहरुमा सहकारीको विषय उठेको तर लामिछानेले ‘सबै कुरा मिलिसक्यो, मैले केही गरेकै छैन’ भनी जिद्दी गरेको ढकालले बताएका छन् । केही दिनअघि पार्टीका नेताहरुसँग भएको फोन संवादमा यसबारे चर्चा भएको पनि उनले जनाए ।
‘तपाईंलाई उतिबेलै थाहा रहेछ, हामीलाई किन नभनेको ? भनेर साथीहरु सोध्छन्’, ढकालले भने, ‘मैले के भन्नु, उतिबेला भनेकै हो, पत्याएनन् । उल्टै ममाथि आक्रमण र प्रहारको काम भयो ।’
टिप्पणीहरू