रवि छुटेको पाँच दिनपछि छवि अदालतमा

स्वर्णलक्ष्मी सहकारी ठगी मुद्दाका प्रतिवादी गोर्खा मिडिया नेटवर्क प्रालिका तत्कालीन उपाध्यक्ष तथा पूर्व डिआइजी छविलाल जोशी काठमाडौँ जिल्ला अदालतमा उपस्थित भएका छन् ।

कास्कीबाट छुटेपछि गत आइतबार नै अदालमा उपस्थित हुनुपर्नेमा उनी एक हप्तापछि आज अदालतमा हाजिर भएका हुन् । मुद्दाको पेशी न्यायाधीश ठाकुरप्रसाद खरेलको इजलासमा तोकिएको छ । 

स्वर्णलक्ष्मी सहकारीमा ६९० बचतकर्ताको झण्डै एक अर्ब २० करोड रकम अपचलन भएको प्रहरी अनुसन्धानबाट खुलिसकेको छ । ३९ जनालाई प्रतिवादी बनाएर मुद्दा दायर गरिएकोमा रास्वपा सभापति तथा गोर्खा मिडियाका तत्कालीन प्रवन्ध निर्देशक रवि लामिछाने ६० लाख धरौटी बुझाएर थुनामुक्त भइसकेका छन् । 

पोखराको सूर्यदर्शन सहकारी ठगी प्रकरणमा सहकारी ठगी, संगठित अपराध र सम्पत्ति शुद्धीकरण कसूरमा मुद्दा चलाइएका रवि र छवि क्रमश: ६५ लाख र ८८ लाख धरौटी बुझाएर छुटेका थिए । उक्त मुद्दा अदालतमा विचाराधीन छ ।