रक्सीको रमिता, होटल साहुको हत्या

हत्यामा संलग्न तीन जना कलिला युवासहित एक अधबैंसे समातिएका छन् । पक्राउ पर्नेमा १६ देखि ५३ वर्ष उमेर समूहका रहेको जिल्ला प्रहरी कार्यालय रोल्पाले जनाएको छ । अभियुक्तहरुको नाम, ठेगाना भने खुलाईएको छैन ।

गत कार्तिक ११ गते रोल्पाको रुन्टीगढी गाउँपालिका¬–२ धौलाडाँडाका व्यापारी दलबहादुर पुनलाई मार्नेमा उनीहरु संलग्न रहेको जिल्ला प्रहरी प्रवक्ता शंकर खड्काले जानकारी दिनुभयो ।

यो समूहले दशैं टिकाको भोलिपल्ट मृतकको होटलमा बसेर मादक पदार्थ सेवन गरी रकम तिर्न नसकेपछि सामान्य विवाद भएको थियो । विवाद बढेसंगै उनीहरु होटल संञ्चालक पुनलाई ढुंगा,मुक्का तथा काठको दाउराले टाउको र शरिरका विभिन्न भागमा हिर्काएर भागेका थिए ।

होटल संञ्चालक पुनको उपचारका लागि अस्पताल लैजाँदै गर्दा बीच बाटैमा मृत्यु भएको हो ।

उमा केसी
लिवांग