विद्यार्थी बोकेको बस दुर्घटना

रामेछापको मन्थलीस्थित मच्छेडाँडीमा आज बिहान स्थानीय सेतिदेवी माध्यमिक विद्यालयबाट राष्ट्रपति रनिङ शिल्ड प्रतियोगितामा भाग लिएका विद्यार्थी बोकेको बस दुर्घटनाग्रस्त भएको छ । अरनिको सुपर बा ५ ख २८५७ नम्बरको रिजर्भ बस दुर्घटना हुँदा त्यसमा सवार झण्डै तीन दर्जन विद्यार्थी घाइते भएको प्रहरीले जनाएको छ ।

तीमध्ये विद्यार्थी प्रतिज्ञा घिमिरेलाई कुनै बाहिरी चोट नदेखिए पनि बेहोस भएकी थिइन् भने गीता काफ्लेलाई अन्यको तुलनामा धेरै चोट लागेको छ । शरिरका विभिन्न भागमा सामान्य घाउचोट लागेका विद्यार्थीहरूमा घनश्याम बरूवाल, मनिषा नेपाली,प्राथुस कार्की, अस्मिता भुर्तेल,करूणा श्रेष्ठ, एलिजा काफ्ले,देवी खत्री रहेको बताइन्छ ।

सम्पूर्ण घाइतेको मन्थलीस्थित तामाकोशी सामुदायिक अस्पतालमा उपचार भइरहेको छ भने चालक वीरेन्द्र बस्नेत फरार भएपछि सालु–मन्थली सडकखण्ड अवरूद्व भएको छ ।