एकातिर संसदीय दल,अर्कोतिर स्थायी समिति

सर्वोच्च अदालतले प्रतिनिधिसभा ब्युँताइदिएपछि प्रधानमन्त्री केपी शर्मा ओलीले नयाँ रणनीति बनाउने ध्याउन्नमा अहिले बिहान ११ बजे आफ्नो समूहको स्थायी समिति बैठक बोलाउनुभएको छ ।

विकसित राजनीतिक घटनाक्रमलाई अझैपनि आफ्नो पक्षमा पार्ने अन्तिम रणनीतिअनुसार नै बैठक बोलाइएको बताइन्छ । अदालतको फैसला भएको १२ घण्टा बितिसक्दा पनि राजीनामा नदिनुभएका ओलीले संसदमा ‘फेस’ गर्ने उहाँको सचिवालयका सल्लाहकारहरूले सामाजिक सञ्जालमार्फत् जानकारी गराएका छन् ।

प्रधानमन्त्री गुटका प्रवक्ता तथा परराष्ट्रमन्त्री प्रदीप ज्ञवालीले अदालतको फैसलालाई अनपेक्षित भन्दै स्वीकार्ने बताउनुभएको छ । तर,उपप्रधानमन्त्री ईश्वर पोखरेलले सामाजिक सञ्जालमार्फत् अदालतको आदेशलाई माने पनि सम्मान गर्न नसकिने बताउनुभएको छ । उहाँले ‘सर्वोच्च अदालतको फैसलाले मुलुकको राजनीतिलाई थप अस्थीर र जटिल बनाउने’ आरोप लगाउनुभएको छ ।

सरकारमा बसेर अदालतको निर्णय मान्दिँन भन्ने आशयले ओली सरकारका मन्त्री र समूहका नेता अझैपनि सत्ता नछाड्ने मनस्थितिमा रहेको प्रष्ट भएको छ । उता, प्रचण्ड–माधव समूहका प्रवक्ता नारायणकाजी श्रेष्ठले प्रधानमन्त्री ओलीले तत्काल राजीनामा दिनुपर्ने बताउनुभएको छ ।

हिजो चितवन पुग्नुभएका अध्यक्षद्वय पुष्पकमल दाहाल ‘प्रचण्ड’ र माधवकुमार नेपाल आज बिहान काठमाडौं आइपुग्नुभएको छ । मध्यान्ह १२ बजे रत्नपार्कमा आयोजना हुने विजयसभामा सहभागी भएपछि नेकपा प्रचण्ड–माधवपक्षका सबै माननीयहरू संसदीय दलको बैठकमा सहभागी हुने कार्यक्रम रहेको छ । नेकपा संसदीय दलको बैठकले बहुमतको आधारमा केपी शर्मा ओलीलाई संसदीय दलको नेताबाट हटाउने निर्णय गर्ने बुझिएको छ ।