ओलीका निर्णयमाथि सँसदमा अँकुश,सभामुखकोमा पत्र दर्ता

नेकपा (बहुमत)ले प्रधानमन्त्री केपी ओलीले संसदीय दलको नेताका रुपमा गरेका कुनै पनि कामकारवाहीलाई मान्यता नदिन सभामुखलगायत संसद सचिवालयसमक्ष अनुरोध गरेको छ ।

आज अपरान्ह पत्र लेखेर नेकपाले प्रधानमन्त्री ओलीलाई पार्टीको साधारण सदस्यसमेत नरहने गरी पहिले नै कारवाही गरिसकिएकोले पार्टीको नाममा उहाँका कुनै पनि गतिविधि मान्य नहुने जानकारी गराएको हो ।

अध्यक्ष पुष्पकमल दाहाल प्रचण्डद्वारा हस्ताक्षरित पत्रमा प्रधानमन्त्री ओलीलाई पार्टीको साधारण सदस्यसमेत नरहने गरी कारवाही गरिएकाले उहाँले गर्ने काम कारबाहीलाई मान्यता नदिन आग्रह गरिएको छ ।

संघीय सँसदका महासचिवलाई सम्बोधन गरी लेखिएको पत्रमा दलका उपनेता सुवास नेम्वाङलाई ६ महिनाका लागि निलम्बन गरिएको पनि उल्लेख छ। पत्रमा संसदीय दलको नेताका रुपमा ओली र उपनेताका रुपमा नेम्वाङले गर्ने कामकारवाही मान्य नहुने बताइएको छ ।

पत्र बुझाउन नेकपाका नेताहरु दिनानाथ शर्मा,देव गुरुङ्ग,पम्फा भुसाल, सुरेन्द्र पाण्डे,जीवनराम श्रेष्ठ संसद सचिवालय पुग्नुभएको थियो । संसद सचिवालयका महासचिव भरत गौतमले पत्र बुझ्न आनाकानी गरेको र पत्र दर्ता गर्न नेताहरुले आग्रह गरेपछि अन्तिममा पत्र दर्ता भएको एक नेताले जानकारी दिनुभयो ।