झुक्याउने खेल अनेक

जनता समाजवादी पार्टी (जसपा) का अध्यक्ष महन्थ ठाकुरले पार्टीका अर्का अध्यक्ष उपेन्द्र यादवलगायतका नेताहरुलाई थाहै नदिई प्रधानमन्त्री केपी ओलीसंग सत्ता सहकार्यको सहमति गरेको खुलासा भएको छ । आज बसेको राजपा संसदीय दलको बैठकमा सांसदहरुले प्रश्न उठाएपछि ठाकुरले त्यसबारे जानकारी दिएका हुन् ।

अध्यक्ष ठाकुर र बरिष्ठ नेता राजेन्द्र महतोले प्रधानमन्त्री ओलीसंग वार्ता गर्नका लागि कार्यदल नै बनाएको खुलेको हो । टोलीमा जसपाको तर्फबाट सर्वेन्द्रनाथ शुक्ल र सांसद लक्ष्मणलाल कर्ण छन् । दुवै पूर्वराजपाका नेता हुन् ।

जसपाभित्र भावी सत्ता समीकरणलाई लिएर दुई धार देखिएको छ । पूर्वराजपाका नेताहरु ओलीसंग मिलेर जानुपर्ने पक्षमा छन् भने पूर्वसमाजवादीका नेताहरु ओलीइतरको गठवन्धन बनाएर जानुपर्ने अडानमा छन् ।

लक्ष्मणलाल कर्णले  कुनै हालतमा प्रधानमन्त्री ओलीसंग सहकार्य नहुने दाबी गरेका थिए ।

यसअघि जसपा कुनै पनि हालतमा ओली नेतृत्वको सरकारलाई निरन्तरता नदिने पक्षमा थियो । दुई हप्ताअघि सो पार्टीका नेता लक्ष्मणलाल कर्णले जनआस्थासंगको कुराकानीमा कुनै हालतमा प्रधानमन्त्री ओलीसंग सहकार्य नहुने दाबी गरेका थिए । प्रधानमन्त्रीको कदमलाई प्रतिगमन भनेर सडकमा ओर्लिसकेपछि त्यहि प्रधानमन्त्रीसंग गरिने सहकार्य अनैतिक हुने उनको भनाइ थियो ।

यता पूर्वसमाजवादीका एक नेताले भने कुनै हालतमा ओलीसंग सहकार्य नहुने बताए । ‘प्रतिगमनकारी भनिसकेपछि उहाँसंग सहकार्य हुँदैन । राजनीतिमा नैतिकता, मूल्य पनि हुन्छ भन्ने कुरा स्थापित गर्नुपर्छ’, उनले भने, ‘उहाँहरुले वार्ता गर्दैमा केही फरक पर्दैन ।’

संसदमा जसपाको ३४ सिट छ । १२० सिट रहेको एमालेलाई सरकार बनाउन राजपाले साथ् दिए पुग्छ । तर, दुवै दलमा विवाद छ ।