समानान्तर युवा संघको कार्यालय बुद्धनगरमा

नेकपा एमालेका बरिष्ठ नेता माधवकुमार नेपालले आफूपक्षीय युवासंघको मुख्यालय उद्घाटन गर्नुभएको छ । पोखरातर्फ प्रस्थान गर्नुअघि बुद्धनगरस्थित रोजबड स्कुल नजिकै कार्यालय उद्घाटन गरिएको हो ।

उक्त कार्यक्रममा बरिष्ठ नेता नेपाल,युवा संघका नवनियुक्त अध्यक्ष नरेशकुमार शाही, पूर्वमन्त्री पुरुषोतम पौडेल, युवासंघका पूर्वअध्यक्ष पशुपति चौलागाई, नेताहरु रघुजी पन्त,दिलुकुमारी पन्त,लगायतको उपस्थिति रहेको बताइएको छ ।

कार्यक्रममा युवासंघका नवनिर्वाचित पदाधिकारी र केन्द्रीय सदस्यहरुले पदभार ग्रहण गरेका थिए ।

नेकपा एमालेमा बरिष्ठ नेताद्वय झलनाथ खनाल र माधव नेपाल पक्षले समानान्तर अभ्यास गरिरहेको छ । अध्यक्ष केपी ओलीले पार्टीमा एकलौटी निर्णय गरेको भन्दै असन्तुष्ट नेपाल-खनाल पक्षले भातृ संगठनहरुमा समानान्तर कमिटी गठनको क्रम अगाडि बढाएको छ । यो पक्षले महिला,विद्यार्थी र युवा संगठनमा समानान्तर कमिटी गठन गरिसकेको छ ।

गतसाता सो पक्षको युवासंघको राष्ट्रिय भेलाले शाहीको नेतृत्वमा केन्द्रीय कमिटी निर्वाचित गरेको हो ।