एपीएफ क्लब ललितपुर मेयर कपको फाइनलमा
नेपाल एपीएफ क्लब ललितपुर मेयर वुमन्स च्याम्पियनसिप–२०७७ टि२० क्रिकेट प्रतियोगिताको फाइनलमा पुगेको छ । मंगलबार ललितपुर मेयर्स–११ लाई १० विकेटले पराजित गर्दै एपीएफले एक खेल अगावै फाइनलमा स्थान बनाएको हो ।
जितको लागि ६७ रनको विजयी लक्ष्य पछ्याएको एपीएफले ९ ओभर १ बलमा कुनै विकेट नगुमाउँदै लक्ष्य पूरा गरेको हो ।
एपीएफको जितमा ओपनर राजमति ऐरी ३१ बलमा ४ चौकासहित ३३ रनमा अविजित रहिन् । ईन्दु बर्मा २४ बलमा ३ चौकासहित २८ रनमा अविजित रहिन् ।
मैदानमा टस जितेर पहिला ब्याटिङ रोजेको ललितपुरले २० ओभरमा ९ विकेट गुमाउँदै ६६ रन बनाएको थियो । ललितपुरका ८ खेलाडीले दोहोरो अंकमा कुनै रन बनाउन सकेनन् ।
ललितपुरको तर्फबाट युवा ब्याट्सम्यान तथा विकेटकिपर कञ्चन श्रेष्ठले सर्वाधिक १७ रन बनाएकी थिइन् । अन्यले भने राम्रो प्रदर्शन गर्न सकेका थिएनन् ।
टिप्पणीहरू