मतदानको दिन बिहानैदेखि यातायात बन्द गर्ने राजधानीका सिडिओहरुको निर्णय

काठमाडौं उपत्यकाका तीन वटै जिल्लाका प्रमुख जिल्ला अधिकारी (प्रजिअ) हरुको संयुक्त बैठकले आगामी निर्वाचनको दिन बिहान ४ बजेदेखि सबै खालका सवारी साधन सञ्चालनमा रोक लगाउने निर्णय गरेको छ । आज जिल्ला प्रशासन कार्यालय, काठमाडौंमा बसेको निर्वाचन सुरक्षाबारे संयुक्त बैठकले उक्त निर्णय गरेको हो । 

तर यसअघि निर्वाचन आयोगले तोकेको निर्धारित मापदण्ड अनुसारका अनुमति प्राप्त सवारीसाधनलाई चल्न दिइने भएको छ । आयोगले अत्यावश्यक सेवाका सवारी साधन सञ्चालनमा रोक नलगाउने निर्णय गरेको छ ।

यसैगरी, काठमाडौ जिल्लाका प्रमुख जिल्ला अधिकारी तथा जिल्ला सुरक्षा समितिका अध्यक्ष घनश्याम उपाध्यायको अध्यक्षतामा बसेको संयुक्त जिल्ला सुरक्षा समितिको बैठकले भोलिदेखि मंसिर ४ गते राति १२ बजेसम्म तीन वटै जिल्लामा मदिरा ओसारपसार, बिक्रीवितरणमा रोक लगाउने निर्णय गरेको छ । त्यसैगरी मतगणनास्थल वरपर गणना नसकिएसम्म रोक लगाउने निर्णय भएको छ ।

बैठकले जिल्लाका विद्युत, खानेपानी, एम्बुलेन्स, दमकल, हेभि इक्युपमेण्ट सेवाका लागि आवश्यक पर्ने जनशक्ति तथा सवारी साधन तयारी अवस्थामा राख्न सम्बन्धित निकायलाई अनुरोध गरिएको छ ।