केपी ओलीको विश्वास जोगाउन नसकेकोमा कमल थापा दुःखी

राप्रपा नेपालका अध्यक्ष कमल थापाले एमाले अध्यक्ष केपी शर्मा ओलीलाई सामाजिक सञ्जालमार्फत शुभकामना दिएका छन् । झापा-५ मा काँग्रेसका खगेन्द्र अधिकारीलाई पराजित गर्दै ओली ५२ हजार ३१९ मतसहित विजयी भएपछि उनले बधाई र शुभकामना दिएका हुन् ।

शुभकामनामा थापाले आफूले ओलीको विश्वास जोगाउन नसकेकोमा दुःख मनाउ पनि गरेका छन् । एमालेकै चुनाव चिह्न सूर्य लिएर मकवानपुर क्षेत्र १ बाट उठेका थापा र काँग्रेसकी डिना उपाध्यायलाई राप्रपाका दीपक सिंहले पराजित गरिसकेका छन् ।

आफू पराजित हुने निश्चित भएपछि मत परिणाम घोषणा गर्नुअघि थापाले एमाले अध्यक्ष ओलीसँग विश्वास जोगाउन नसकेकोमा दुःख मनाउ गरेका हुन् ।

फेसबुकमा ओलीलाई उल्लेख गर्दै थापाले लेखेका छन्, ‘मलाई विश्वास गर्नुभएकोमा केपी शर्मा ओलीलार्ई धन्यवाद  । तर,तपाईंको विश्वास जोगाउन नसकेकोमा दुःखी छु । तपाईंलाई मेरो शुभकामना ।’