समानुपातिकतर्फ नेकपा एसको मत कमजोर,एमाले भने शीर्षस्थानमै

प्रतिनिधिसभा सदस्य निर्वाचनमा बझाङ्गबाट सबैभन्दा बढी मत ल्याएर निर्वाचित भएको नेकपा एकीकृत समाजवादी पार्टीको नतिजा समानुपातिकतर्फ भने ५ गुणा तल छ । जबकि समाजवादीका उम्मेदवार भानुभक्त जोशी नेकपा एमालेका उम्मेदवार ऐन महरलाई करिब एक हजार मतले पछि पार्दै निर्वाचित भएका छन् । 

जोशी २८ हजार १४३ मतसहित विजयी हुँदा एमालेका महरले २७ हजार १४६ मत प्राप्त गरेका थिए ।  तर,समानुपातिकतर्फ भने समाजवादी न्यून मतका साथ चौथो स्थानमा देखिएको छ । बझाङ्गमा एक लाख २२ हजार ३७६ मतदाता भए पनि जम्मा ९५ हजार ७३५ मत खसेको थियो । 

सोमध्ये कूल ९१ हजार ७०६ मत सदर भएको प्राप्त विवरणमा उल्लेख छ । यता,चार हजार १९ मत बदर भएको छ । समानुपातिकतर्फ नेकपा एमाले २३ हजार ४७४ मतसहित पहिलो स्थानमा छ । नेपाली कांग्रेसले २० हजार ३३१ मत प्राप्त गरेको छ । 

यता,नेकपा माओवादी केन्द्र आठ हजार ५१७ मतसहित तेस्रो स्थानमा छ । एकीकृत समाजवादीले भने पाँच हजार नौ मत पाएको छ । राष्ट्रिय स्वतन्त्र पार्टी एक हजार ३३१ मतसहित बझाङ्गमा अन्तिम स्थानमा छ । 

गत आइतबार सम्पन्न प्रतिनिधि सभा तथा प्रदेश सभा निर्वाचनमा समानुपातिकतर्फ देशभरबाट नेकपा एमाले शीर्ष स्थानमा छ । समानुपातिकको शुरुवाती गणनादेखि नै ऊ सबैभन्दा अगाडि छ ।