२२ गते आइसक्ने भनिएको अन्तिम निर्वाचन परिणाम २६ गतेसम्म धकेलिने

प्रमुख निर्वाचन आयुक्त दिनेशकुमार थपलियाले मंसिर २६ गतेसम्ममा निर्वाचन प्रक्रियाका सम्पूर्ण काम सकाउने दाबी गर्नुभएको छ । आज राजधानीमा आयोजित एक कार्यक्रमलाई सम्बोधन गर्दै थपलियाले निर्वाचन कार्य मंसिर २६ गतेसम्म सबै सकाइने बताउनुभएको हो । 

सोमबारसम्म सबै मतगणना सम्पन्न हुने उल्लेख गर्दै उहाँले भन्नुभयो, ‘२२ गतेसम्म दलहरुसँग पत्राचार भइसक्छ । त्यसको लागि तीन दिन लाग्ने र पत्र प्राप्त भएको दुई दिनभित्रमा आयोगले सम्पूर्ण प्रतिवेदन तयार गरेर सम्माननीय राष्ट्रपतिज्यूसमक्ष बुझाउने भनेका थियौं ।’ 

तर यसअघि २२ गतेको म्यादमा सबै काम नसकिने निश्चित भएको हो । त्यसैले आयोगले २६ गतेको नयाँ भाखा तय गरेको बताइन्छ । एउटा अर्को सन्दर्भमा प्रमुख आयुक्तले आगामी दिनमा अब निर्वाचन एकै चरणमा गर्न सकिने मान्यता स्थापित भएको बताउनु भएको छ ।

आफूहरु वर्तमान निर्वाचन कानूनसँग सन्तुष्ट नभएको उहाँको भनाइ छ । ‘हामी वर्तमान निर्वाचन कानूनसँग सन्तुष्ट छैनौँ । छिट्टै नयाँ कानूनद्वारा निर्वाचनको व्यवस्थापन गरिनुपर्छ भनेर व्यापक तयारी गरिरहेका छौँ । सम्भवतः नयाँ संसदको नयाँ अधिवेशनमा नयाँ कानून निर्माणको प्रक्रिया प्रवेश गर्नेछ ,’उहाँले भन्नुभयो ।