नेकपा एसले एक सीट पनि जित्दैन भन्ने कर्णबहादुरको खोजी

नेकपा एमाले सुदूरपश्चिम प्रदेशका अध्यक्ष तथा बाजुराबाट हिजो पराजित कर्णबहादुर थापाले नेकपा एकीकृत समाजवादी पार्टीका बारेमा गर्नुभएको भविष्यवाणी असत्य साबित भएको छ ।  चुनावअघि प्राइम टेलिभिजनद्वारा सञ्चालित ‘जनता जान्न चाहन्छन्’ कार्यक्रममा उहाँले माधवकुमार नेपालको पार्टीले प्रतिनिधि सभा सदस्यमा प्रत्यक्षतर्फ एक सीट पनि नजित्ने दाबी गर्नुभएको थियो । 

नेकपा एसले एउटा सीट जित्यो भने आत्मालोचना गर्ने उहाँको ठोकुवा थियो । समाजवादीका उम्मेदवारले जित्दै नजित्ने उल्लेख गर्दै उहाँले जितेको खण्डमा सोही कार्यक्रममा आएर माफी माग्ने घोषणा गर्नुभएको थियो । 

अन्तरवार्तामा उहाँले भन्नुभयो,‘माधवकुमार नेपालको पार्टीले एउटा सीट जित्यो भने मैले आत्मआलोचना गर्नेछु । मैले गलत कुरा बुझेछु । मैले राजनीति बुझेको रहेनछु । मैले नेपाल बुझेको रहेनछु । नेपालको जनमत बुझेको रहेनछु भन्दै शीर निहुराएर म गलत भएको स्वीकार्नेछु ।’

थापा आफ्नो अभिव्यक्तिका कारण विवादमा तानिनुभएको छ । आफ्नो जीतको चिन्ताभन्दा अरुको हारमा रमाउने भन्दै उहाँको विरोध भइरहेको छ । समाजवादीले प्रतिनिधि सभा सदस्य प्रत्यक्षतर्फ १० सीटमा बाजी मारेपछि उहाँको खोजी गर्न थालिएको छ । उहाँलाई कार्यक्रममा ल्याएर माफी माग्न लगाउने भन्दै कार्यक्रम प्रस्तोता ऋषि धमला कस्सिएका छन् । 

१९ सीटमा उम्मेदवारी दिँदा समाजवादीले १० सीट जितेर समानुपातिकबाट भने ३ प्रतिशतको थ्रेस होल्ड कटाउन सकेन । अछाम निर्वाचन क्षेत्र नम्बर १ बाट शेरबहादुर कुँवर,बारा निर्वाचन क्षेत्र नम्बर ४ बाट कृष्णकुमार श्रेष्ठ, रौतहट निर्वाचन क्षेत्र नम्बर १ बाट माधवकुमार नेपाल,डोटीबाट प्रेमबहादुर आले,बझाङबाट भानुभक्त जोशीलगायतले चुनाव जितेका छन् ।