चुनावी परिणाम देख्दा पुराना दलहरु नै चकित

आन्तरिक कलह, राजनीतिक दलप्रतिको वितृष्णा तथा युवाको बदलिँदो चाहनाका कारण पुराना दल विस्तारै ओरालो लाग्न थालेका छन् । समानुपातिक मतका आधारमा पनि यसअघि भन्दा कम मत प्राप्त गरेका दलको हैसियत कमजोर देखिएको छ । ०६४ मा भरभराउँदो माओवादी खस्किएर चौथो दल बनेको छ । उसलाई नया“ दलले उछिनेको छ ।

राजधानीसँग जोडिएको काभ्रेपलाञ्चोक जिल्लामा पनि निर्वाचनपछि पार्टी र नेताहरूको हैसियत, सांगठनिक विषय, नेतृत्वको क्षमता तथा घात–अन्तर्घातबारे छलफल शुरु भएको छ । कांग्रेसले आन्तरिक घातका कारण प्रतिनिधि सभा २ मा पराजय ब्यहोर्नुपरेको बताएको छ । घात गर्ने नेतालाई देखाइदिन्छु भन्दै उम्मेदवार शिवप्रसाद हुमागाईं मतदातालाई धन्यवाद दिन व्यस्त छन् । उता, विजयी गोकुल बाँस्कोटा पनि मतदाताको घर दैलोमा पुगिरहेका छन् । अन्य पाँच उम्मेदवारले दलको आन्तरिक कारण समानुपातिक र प्रत्यक्षमा सोचेजस्तो परिणाम आउन नसकेको बताएका छन् । जिल्लामा नेकपा एमाले जिल्लामा पहिलो पार्टी बनेको छ । ५८ हजार ७ सय ८४ मत ल्याएर समानुपातिकतर्फ ऊ पहिलो दल बनिरहँदा नेपाली कांग्रेस ४८ हजार ३ सय ११ ल्याएर दोश्रो बनेको छ । राष्ट्रिय स्वतन्त्र पार्टी २६ हजार ३ सय १८ मत ल्याएर तेश्रो दल बनेको छ । चौथोमा पुगेको माओवादीले २५ हजार २ सय ६१ मत प्राप्त गरेको छ । पाँचाैँमा नेकपा समाजवादीले जिल्लाभरबाट ८ हजार ९८ मत प्राप्त गरेको छ । छैटाैँ नम्बरमा राप्रपाले ६ हजार २ सय २१ मत ल्याएको छ । 

प्रतिनिधिसभा १ मा विजयी सूर्यमान दोङ माओवादी नेता हुन् । ०६४ सालमा संविधानसभा सदस्य विजयी दोङलाई अर्जुन लामाको अपहरणपछि हत्या गरेको अभियोगमा दर्ता भएको मुद्दा विचाराधीन छ । ०७० मा नेपाली कांग्रेसका तीर्थ लामासँग पराजित उनले ०७४ मा सहकारीको ऋणमा साक्षी बसेर कालोसूचीमा परेको कारण टिकट पाउन सकेनन् । प्रदेश सभातर्फ निर्वाचित रत्न ढकाल माओवादी केन्द्रका नेता हुन् । बागमती प्रदेश सरकारका खेलकुदमन्त्री उनी यसअघि नेकपा एमालेसँगको तालमेलमा विजयी भएका थिए । प्रदेश सभामा निर्वाचित तीर्थ लामा ३ मतको झिनो मतान्तरले विजयी भए । संविधान सभा सदस्यमा निर्वाचित लामा ०७४ मा माओवादीका गंगाबहादुर दोङबाट पराजित भएका थिए । प्रतिनिधिसभामा टिकट नपाएपछि प्रदेश सभामा केन्द्रीय सदस्य गणेश लामाको टिकट खोसेर ल्याएका लामा जिल्ला सभापति हुन् । बागमती प्रदेशमा मुख्यमन्त्रीको दाबेदार छन् । बागमती प्रदेशका लागि निर्वाचित लक्ष्मण लम्साल नेकपा समाजवादीमा छन् । एक सांसद, जिल्ला समन्वय प्रमुख र एउटा नगरमा प्रमुख विजयी भएको समाजवादी समानुपातिकतर्फ पाँचाैँ नम्बरमा छ । अर्का सांसद कञ्चनचन्द्र बादे कांग्रेस बागमती प्रदेशका महामन्त्री छन् । 

जमानत पनि जोगिएन

काभ्रेका दुईवटा प्रतिनिधिसभा र ४ वटा प्रदेश सभामा उम्मेदवारी दिएका ६४ उम्मेदवारमध्ये ३८ जनाको जमानत जफत भएको छ । पूर्वमन्त्रीसमेत रहेका गोकुल बाँस्कोटालाई पराजित गर्ने उद्घोष गरेका स्वतन्त्र उम्मेदवार मनोज पण्डितले १ सय ७३ मत प्राप्त गरे । संघीय लोकतान्त्रिक राष्ट्रिय मञ्चका विजय तामाङले ३५ मत पाए । सिद्धिबहादुर जोशी, यशु आले मगर, कृष्णकुमार वैद्य, योकबहादुर घिसिङ, अचम्म लामा, विजय तामाङ, उत्तरकुमार लामा, गंगालाल श्रेष्ठ, कृष्ण खत्री, बोधनाथ न्यौपाने, मनोज पण्डित, शेषराज लामिछाने र स्वयम्भूराज शाक्यको जमानत जफत भएको छ । प्रदेश १ मा एमालेका कुमार खकुरेल १ सय ८८ मतले पराजित भए । त्यहाँबाट राप्रपाका रञ्जीव श्रेष्ठ, नेमकिपाका सूर्यलाल तामाङ, हाम्रो नेपाली पार्टीका ताराबहादुर कुँवर र मंगोल नेशनल अर्गनाइजेशनका मुस्कान लामाको जमानत जफत भएको छ । राप्रपाका रामकृष्ण लामा, नेमकिपाका मुना तामाङ, जनता समाजवादीका वीरबहादुर तामाङ, नेपाल कम्युनिष्ट पार्टीका दानबहादुर थापा र मंगोल नेशनल अर्गनाईजेसनका सुकमान तामाङको पनि जमानत जोगिन सकेन ।

– मोतीराम तिमल्सिना