रविको पार्टीभित्र भाँडभैलोको संकेत,महामन्त्रीमाथि ‘क्लब’ चलाएको आरोप

राष्ट्रिय स्वतन्त्र पार्टीका महामन्त्री मुकुल ढकालले समानुपातिक सूचीमा मनोमानी गरेको भन्दै रवि लामिछाने नेतृत्वको पार्टीभित्र असन्तुष्टि चुलिएको छ ।

समानुपातिकतर्फ १३ जना सदस्यको नाम छान्दा आफ्नी गुरुआमा डा. चन्दा कार्कीलाई नियम मिचेर सांसद बनाएपछि उनीविरूध्द केन्द्रीय सदस्य गणेश कार्की र दीपक बोहोरा समूह खनिएको हो । 

केन्द्रीय सदस्य कार्कीले पार्टी महामन्त्री ढकालले आफ्नी गुरुआमालाई गुरुदक्षिणा दिएपछि आफू र अर्का केन्द्रीय सदस्य दीपक बोहोरा सांसद नभएको दाबी गरेका छन् । पार्टी सभापति रवि लामिछानेलाई समेत गुमराहमा राखेर उनले समानुपातिक सूचीमा आफूखुशी कैंची चलाएको रवि पक्षधरहरुको गुनासो छ ।

‘देशभर फैलिरहेको नयाँ पार्टीलाई मुकुल ढकालले ठूलो घात गरे । सुरुआती चरणमै नचाहिँदो पावर शो गरे । ढकालजी महामन्त्रीजस्तो निर्णायक पदमा बस्न योग्य देखिएनन् । पार्टी चलाउने कुरा क्लब चलाएजस्तो होइन नि ! रवि दाइले यस्ता कुरामा ध्यान नदिने हो भने यो पार्टीको पनि कुनै काम छैन,’एक केन्द्रीय सदस्य भने ।

समानुपातिक सूची बोकेर पार्टी कार्यालयदेखि निर्वाचन आयोगसम्म दौडिरहेका महामन्त्री ढकालले राष्ट्रिय स्वतन्त्र पार्टीले पाएको जनमतको अपमान गरेको केन्द्रीय सदस्य कार्की–बोहोरा समूहका एक नेता बताउँछन् ।

स्रोतका अनुसार सभापति लामिछानेलाई शुरुदेखि नै साथ दिँदै आएका केन्द्रीय सदस्य दीपक बोहोरा र निर्वाचनमा राम्रोसँग खटिएको भनिएका केन्द्रीय सदस्य गणेश कार्कीलाई सभापतिको ‘कोर टिम’ बाट बाहिर राख्ने महामन्त्री ढकालको चाहना भएको अर्को आरोप पनि लागेको छ ।

‘मुकुलजीभन्दा पार्टीमा दीपक दाइ र गणेश दाइको धेरै योगदान छ । उहाँ रवि दाइका कारण महामन्त्री चुनिनुभएको हो । तर उहाँमा एकाएक दम्भ बढ्यो । पार्टी भनेकै मै हुँजस्तो गर्न लाग्नुभयो । यस्तो पनि हुन्छ ? यसरी चल्छ पार्टी ?,’ बोहोरानिकट एक जना सदस्यले भने ।

राष्ट्रिय स्वतन्त्र पार्टीका पदाधिकारी तथा वरिष्ठ नेताहरूले महामन्त्री ढकालकी गुरुआमा डा. कार्कीसँगै केन्द्रीय सदस्य निशा डाँगी र पूर्वपत्रकार विनिता कठायतलाई नियम मिचेर सांसद बनाएको दाबी गरेका छन् । महामन्त्री ढकालको भूमिकालाई लिएर धेरैजसो केन्द्रीय सदस्य असन्तुष्ट रहेको बताइन्छ ।

‘निर्वाचनपूर्व पार्टीभित्र एउटा नौलो अभ्यास प्रयोग गरियो,आन्तरिक प्रजातन्त्र । तर सांसद छान्ने बेला आफ्नै मान्छे छानियो । यो राम्रो संकेत होइन । महामन्त्री ढकालले रविको पार्टी बनाउँदैनन्,डुबाउँछन्,’ लामिछाने निकट अर्का नेताले आक्रोश पोखे ।