नेकपा (एस) निकट अखिलको केन्द्रीय टोली लेबनान प्रस्थान

विश्व प्रजातान्त्रिक युवा महासंघको २१ औं साधारण सभामा सहभागी हुन नेकपा एकीकृत समाजवादी पार्टीनिकट विद्यार्थी संगठन अनेरास्ववियूको टोली लेबनानतर्फ लागेको छ । लेबनानको बेरुतमा हुन लागेको ‘वर्ल्ड फेडरेशन अफ डेमोक्रेटिक युथ’ को बैठकमा सहभागी हुन उक्त टोली उतातिर प्रस्थान गरेको हो । 

संसारभरिका झण्डै दुई सय प्रगतिशील,समाजवादी संगठनहरु आबध्द रहेको उक्त कार्यक्रम डिसेम्बर १५ देखि २० गतेसम्म सञ्चालन हुँदैछ । दोस्रो विश्वयुध्दपछि साम्राज्यवादविरुध्द र समाजवादको पक्षमा युवा विद्यार्थीहरुको संघर्षमय अभियानस्वरुप सन् १९४५ मा बेलायतको लण्डनमा फेडरेशन स्थापना भएको थियो । 

एउटा मुलुकले अर्को मुलुकलाई गर्ने नाङ्गो हस्तक्षेपविरुध्द संसारभर आन्दोलन सिर्जना गरी हरेक मुलुकको सार्वभौमसत्ता जोगाउन संघर्षरत संगठनमा नेपालबाट युवा संघ र अनेरास्ववियु आबध्द रहँदै आएका छन् । 

सामाजिक जागरणमा स्थापित ठूलो संगठनले आफ्नो भावी कार्ययोजना, फेस्टिभलहरुको आयोजना र सम्मेलनको मिति तय गर्दछ । नेपाली कम्युनिष्ट आन्दोलनका केही नेताहरु यो संगठनबाट स्थापित भएको बताइन्छ । 

योगेन्द्र शाही,उदयराज पाण्डेलगायत केही नेता यस संगठनको उपाध्यक्ष भइसकेका छन् । आबध्द भएदेखि निरन्तर सक्रिय सहभागिता जनाउँदै आएको अनेरास्ववियुको तर्फबाट सहभागी हुन अध्यक्ष सुदेश पराजुली, उपाध्यक्ष माधव पन्त,सुदीप शर्मा र महासचिव आरती लामाको टोली लेबनान प्रस्थान गरेको छ । 

बैठकमा सहभागी नेताहरुले समग्र एशिया र नेपालको प्रगतिशील युवा विद्यार्थी आन्दोलनका चुनौती र उपलब्धिबारे धारणा राख्नेछन् । त्यस्तै,आगामी कार्यभारको विषयमा पनि छलफल गरिने केन्द्रीय उपाध्यक्ष पन्तले बताए ।