भट्टको अकुत रकम साट्सुट किन बेलैमा भेटिएन ?

बिचौलिया दीपक भट्टको शंकास्पद कारोबारको विवरण बाहिरिएपछि केही प्रश्न सँगसँगै उत्पन्न भएको छ-नेपाल राष्ट्र बैंकको निरीक्षण तथा सुपरीवेक्षणमा सञ्चालन हुँदै आएका वाणिज्य बैंकहरुमा भएका भट्टको शंकास्पद कारोबार विवरण किन केन्द्रीय बैंकले बेलैमा पत्ता लगाउन सकेन ?

बैंकमा रहेको वित्तीय जानकारी इकाइमा प्राप्त गो एएमएल सफ्टवेयरमार्फत् बाहिरिएको उनको करोडौंको अस्वाभाविक कारोबारबारे बैंक सुपरीवेक्षण विभागबाट नियमित रुपमा खटिने स्थलगत र गैरस्थलगत निरीक्षण टोलीले किन हेक्का राखेनन् ? यसबारे बैंक सुपरीवेक्षण विभागका एक जना निर्देशकले बताए, ‘पहिले किन यस्तो भयो भन्नेबारे हामीले पनि भन्न सक्दैनौं । तर पछिल्लो समयमा हाम्रो विभागको निरीक्षण टोली सशक्त ढंगले खटेको छ ।’

भट्टले डेढ वर्षअघि सिध्दार्थ बैंकमा रहेको जगदम्बा स्टिल प्रालिको खातामा ४५ करोड रुपैयाँ ट्रान्सफर गरेका थिए । उक्त रकम नेपाल इन्भेष्टमेण्ट बैंकस्थित भट्टको खाताबाट त्यहाँ सारिएको बताइन्छ । जबकि जगदम्बाले उक्त रकम सिध्दार्थ बैंकको खाताबाट खर्च गरे पनि आफ्नो कम्पनीको वासलातमा देखाएको छैन ।

आफ्नो इन्फिनिटी होल्डिङ्स प्राइभेट लिमिटेडको नाममा बिचौलिया भट्टले सन् २०२१ को जुन र जुलाईमा गरेका केही कारोबारलाई मात्र आधार मान्दा पनि उनी आफैँ शंकास्पद हुन् भन्न गाह्रो नहुने वित्तीय जानकारी इकाइ स्रोतले बतायो । भट्टको कार्यालय कमलपोखरी मोड,मार्कोपोलो बिजनेस होटल नजिकै सिध्दार्थ बैंकको मुख्य कार्यालयमा रहेको ओभर ड्राफ्ट खाताको लिमिटभन्दा धेरै गुणा रकम प्रयोग गर्नुलाई पनि ‘बैंकिङ नर्म्स’ भन्दा बाहिरको गतिविधि मानिन्छ ।

"इन्फिनिटीको नाममा खोलेको खाताको लिमिट ४४ करोड हुँदा पनि ६३ करोड ४० लाख रुपैयाँ खर्च गरेको पाइनुले भट्टसँग स्वयम् सम्बन्धित बैंकका अधिकारीहरुको समेत मिलेमतो रहेको स्पष्ट हुने केन्द्रीय बैंकका एक जना सञ्चालकले बताए ।"

सोही सन्दर्भमा एफआईयु स्रोत भन्छ, ‘यसबारे हामीले केन्द्रीय बैंकमा अन्तर विभागीय छलफल गरेका छौं । विशेगरी बैंक सुपरीवेक्षण विभागको स्थलगत टोलीले त्यसमा ध्यान नपुर्याएकोमा कमजोरी महशुस भएको छ । ५० लाखको लिमिट भएको खाताबाट ४५ करोड ४ लाखभन्दा बढी खर्च गर्ने अधिकार सिध्दार्थ बैंकलाई कसले दियो ? त्यसो हुँदा केन्द्रीय बैंकको सम्बन्धित डेस्क र टोलीले के हेरेर बसे ? भन्ने प्रश्न महत्वपूर्ण छ ।’

बिचौलिया भट्टले आफूले झैँ कम्पनीको नाममा खोलिएको ओडी खाताबाट पनि त्यसैगरी लिमिटभन्दा बढी खर्च गरेर शंकास्पद ठाउँमा लगानी गरेको पाइएको छ । उनले इन्फिनिटीको नाममा खोलेको खाताको लिमिट ४४ करोड हुँदा पनि ६३ करोड ४० लाख रुपैयाँ खर्च गरेको पाइनुले भट्टसँग स्वयम् सम्बन्धित बैंकका अधिकारीहरुको समेत मिलेमतो रहेको स्पष्ट हुने केन्द्रीय बैंकका एक जना सञ्चालकले बताए । 

एफआईयुका अधिकृतहरु भने भट्टले ओभरड्राफ्टको सीमाभन्दा बढी खर्च गर्नुलाई भन्दा उनको खातामा जम्मा भएका करोडौं रकमलाई बढी शंकाको दृष्टिकोणले अनुसन्धान गर्नुपर्ने बताउँछन् । विदेशबाट प्राप्त रकमको बारेमा आँखा लाग्ने भएपछि उनले विभिन्न स्रोतबाट नेपाल ल्याएको करोडौं रुपैयाँलाई यहिँभित्र खातामा पटक पटक जम्मा गराएको देखिन्छ । त्यस्तो रकमको जरैसम्म गएर अनुसन्धान गर्दा सबै रहस्य खुल्ने उनीहरुको भनाइ छ ।

एफआईयु जरैसम्म पुग्न नसकेको हो भन्ने जनआस्थाको जिज्ञासामा इकाइका एक जना अधिकृतले भने, ‘हामीले शंकास्पद रकमबारे पहिल्याउने हो । आवश्यक छानबिन र अनुसन्धान गर्ने निकाय बैंक र अन्य सरकारी निकाय हुन् ।’