रकमको लेनदेनमा विमानस्थलभित्र छिर्यो अख्तियार,वीचैमा दुई युवती प्रकट

अख्तियार दुरुपयोग अनुसन्धान आयोगले काठमाडौं विमानस्थलको डोमेस्टिकतर्फका कार्यालय प्रमुख पूर्णप्रसाद चुडालको कार्यकक्षमा आज दिउँसो छापा मारेको छ । सेवाग्राहीबाट डेढ लाख रुपैयाँ नगद लिएको सूचनालगत्तै आयोग टोली त्यहाँ पुगेको बताइन्छ । 

टोली पुग्दा नपुग्दै अर्को डेढ लाख रुपैयाँ भने गायव भएको थियो । तर सो रकम दिने सेवाग्राहीले पैसा मागेको र लिएको भिडियो,टेलिफोन,म्यासेज सबै सुरक्षित राखेको बुझिएको छ । कार्यालयमा रकम बुझ्ने बित्तिक्कै सेवाग्राहीलाई बस्न आग्रह गरिएको, सोही क्रममा दुई वटी युवती कार्यकक्षमा छिरेकोसम्म रेकर्ड आयोगको टोलीले फेला पारेको बताइन्छ । 

रकम दिएको आधा घण्टापछि सेवाग्राही त्यहाँबाट निस्केको र त्यसबीचमा अरु मान्छे छिरेका हुनाले सोही बेलामा रकम अन्यत्रै पुर्याइएको हुनसक्ने दाबी छ । सम्भवतः शौचालयमा उक्त रकम अर्कै मान्छेलाई हस्तान्तरण गरिएको हुनसक्ने आशंका छ ।

सेवाग्राहीसँग घुसवापत सोझै रकम लिएकाले आजको छापा स्टिङ्ग नभएको आयोग स्रोतले बतायो । विमानस्थलका कर्मचारीले भित्र छिर्ने पासको निम्ति ट्राभल एजेन्सीसँग घुस लिने गरेको र सोही क्रममा आज फेला परेको सुरक्षा श्रोतले बतायो । ट्राभल एजेन्सीहरुसँग पासवापत मासिक १० हजार प्रति एजेन्सीको दरले रकम बुझ्दै आएको तथ्य पनि खुलेको छ । रकम नल्याउने एजेन्सीलाई धम्की दिएर आइन्दा पास उपलब्ध नगराउने बताएपछि आज उक्त रकम बुझाउन गएको बुझिएको छ । रकम दिइएको भिडियो र भ्वाइस अख्तियारले फेला पारेको छ ।

विमानस्थलमा सामान्यतयाः पाँच किसिमका पास वितरण गरिन्छ । आगन्तुकलाई भी, विमानस्थलमा कार्यरत कर्मचारीको निम्ति एस, विदेशी कुटनीतिक नियोगलाई एफ, विशेषलाई एसपी र कामदारलाई डब्लु लेखिएको पास दिने गरिएको छ ।