आत्मदाहको घटनामा आफूसमेत दोषी रहेको गृहमन्त्रीको स्वीकारोक्ति

उपप्रधान तथा गृहमन्त्री रवि लामिछानेले प्रेम प्रसाद आचार्यको आत्मदाहलाई नयाँ राजनीतिक शक्तिहरुको उदयले पनि आशा जगाउन नसक्नुको परिणाम भनेका छन् । हिजो बानेश्वर चोकमा आत्मदाह गरेका आचार्यको उपचारका क्रममा आज निधन भएपछि गृहमन्त्रीको यस्तो टिप्पणी आएको हो । 

गृहमन्त्री लामिछानेले विगतदेखिको निराशा र नयाँ दलहरूको आगमनले पनि उत्साह थप्न नसकेपछि आचार्यले आत्मदाह गरेको भन्दै घटनाप्रति दु:ख व्यक्त गरेका छन् । सामाजिक सञ्जालमार्फत उनले भनेका छन्, 'मलाई थाहा छ, आत्मदाहको निर्णय हिजो देखिको निराशा र पीडाको परिणाम  हो । दुख त मलाई यसमा लागेको छ कि हामी जस्ता नयाँहरुको आगमनले समेत तपाईमा उत्साह थप्न सकेन, आशा जगाउन सकेन, आत्मदाहको निर्णय फेर्न सकेन । यसमा हामी दोषी छौँ, म दोषी छु ।'

हिजो दिउँसो संसद् भवनअगाडि शरीरमा पेट्रोल छर्केर आत्मदाहको प्रयास गरेका इलामको सूर्योदय नगरपालिकाका ३७ वर्षीय आचार्यको कीर्तिपुरस्थित बर्न अस्पतालमा उपचारका क्रममा आज बिहान निधन भएको हो । आगो लगानुअघि उनले आफ्नो असफलताको कथासहित राजनीति र व्यवस्थाप्रति असन्तुष्टी जनाउँदै फेसवुकमा लामो स्टाटस लेखेका थिए ।

मुलुक चलाउने हुटहुटीमा सत्तामा पुगेका भन्दै उनले उपप्रधानमन्त्री लामिछानेलगायत नयाँ राजनीतिक शक्ति र पात्रहरुलाई जनताका मुद्दा आँखा च्यातेर केलाउन आग्रह गरेका थिए ।