डाक्टरको हडतालले वीरका बिरामी अलपत्र, सिंहदरबारमा वार्ता

भीआइपी सुरक्षाका नाममा प्रहरीले सेवामा खटिएका डाक्टर कुटेपछि नेपाल चिकित्सक संघ आल्दोलित हुँदा वीर अस्पतालमा बिरामीहरु अलपत्र परेका छन् ।

शुक्रबार प्रतिनिधिसभामा सम्बोधनका लागि राष्ट्रपतिको सवारी हुँदा प्रहरीले सडकमा हिंडिरहेका ट्रमा सेन्टरका एक वरिष्ठ सर्जनमाथि निर्मम कुटपिट गरेको थियो । त्यसको विरोधमा आन्दोलनमा उत्रिएको चिकित्सक संघले आकस्मिकबाहेक वीरका सेवा सबै ठप्प पारेको छ । जसका कारण उपचारका लागि अस्पताल आएका बिरामी अलपत्र परेका हुन् । 

स्याङजाका एक बिरामी रामेश्वर न्यौपाने भन्छन, ‘अस्पतालमा उपचारका लागि आइयो तर यहाँ तालाबन्द छ,अब कसरी उपचार गर्नु ? अलपत्र परियो ।’ 

सरकारले सो घटनामा संलग्न एक प्रहरी अधिकारीलाई निलम्बन गरेको छ भने प्रधानमन्त्री आफैँले अग्रसरता लिएर चिकित्सक संघका पदाधिकारीसँग वार्ता गरिरहनु भएको छ । तथापि डाक्टरहरुको आन्दोलन रोकिएको छैन । 

आज प्रधानमन्त्री तथा मन्त्रिपरिषद कार्यालयमा बिहानैदेखि सरकार र चिकित्सिक संघका पदाधिकारीबीच वार्ता भइरहेको छ ।