जर्नेलहरुको टोली अफ्रिकाबाट फिर्ती

जर्नेल सीताराम खड्काको नेतृत्वमा अफ्रिका गएको पाँच सदस्यीय टोली स्वदेश आइपुगेको छ । टोली फ्लाई दुबईको उडान नम्बर एफजेट् ५३९ बाट आज दिउँसो काठमाडौं आइपुगेको बताइएको छ । 

उक्त टोली माघ २१ गते दुबई हुँदै सेन्ट्रल अफ्रिका गएको थियो । त्यहाँ तैनाथ राष्ट्रसंघीय शान्ति सैनिक मिसन मिनुस्का मिसन कारमा तैनाथ नेपाली शान्ति मिसनहरु, सैनिक प्रहरी युनिट र नयाँ तैनाथ युनिट लाइट इन्फेन्ट्री बटालियनको वस्तुस्थिति, अपरेशनल तथा बन्दोबस्तीको निरीक्षणको निम्ति टोली गएको हो ।

टोलीमा खड्काका साथै उपरथी ताराध्वज पाण्डे र अन्य तीन जना छन् । सेनाको पाँच सदस्यीय टोली आज दिउँसो साढे ३ बजे काठमाडौं आइपुगेको हो ।