सिंगापुर एअरलाइन्सका पाइलटले ब्रेक लगाउन बिर्सेपछि...

सिंगापुरबाट भारतको राजधानी नयाँ दिल्लीका लागि उडेको सिंगापुर एअरलाइन्सको विमान इन्दिरा गान्धी अन्तर्राष्ट्रिय विमानस्थलमा दुर्घटनामा परेको छ । रन वेमा अवतरणपछि पार्किङ वेमा आइपुगेको ए ३८० विमानका चालकले ब्रेक लगाउन बिर्सेपछि भएको दुर्घटनाम विमानमा रहेका उडान दलका एक सदस्य घाइते भएको बताइएको छ । 

भनिएको स्थानमा नरोकिएपछि विमान ढल्कन पुगेको थियो । पछि चालकले विमानलाई भनिएको स्थानमा रोके पनि उडान दलका एक जना सदस्यलाई सामान्य चोट लागेको सिंगापुर एअरलाइन्सले जनाएको छ । 

सबै यात्रु सुरक्षित रहेको जनाउँदै विमान कम्पनीले सोमबार रातिको उक्त घटनाप्रति क्षमायाचना गरेको छ । विश्वका प्रख्यात र विश्वसनीय विमान कम्पनीमध्येको एक सिंगापुर एअरलाइन्सको विमानमा भएको उक्त कमजोरीलाई ठूलै घटनाको रुपमा लिइएको छ ।